რიონის ხეობის მცველები Tbilisi Pride-ის წინააღმდეგ თბილისში ჩამოდიან და ძალადობრივ ჯგუფებს უერთდებიან. ინფორმაცია ამის შესახებ On.ge-ს ერთ-ერთმა აქტივისტმა, მარიტა მუსლიანმა დაუდასტურა.

"მოვდივართ უკვე თბილისში. შევუერთდები მოკლე დროში. მოძრაობიდან ბევრი ადამიანი უერთდება. ისინი დამოუკიდებლად სხვადასხვა დროს ჩამოდიან, რადგან ჩვენი აქცია არაა და არ დაგვიანონსებია. საპატიარქოს მოწოდებით ძალიან ბევრი ადამიანი წამოვიდა. საორგანიზაციო ჯგუფი ერთად ვართ, რასაკვირველია", — ამბობს მარიტა მუსელიანი On.ge-სთან.

On.ge-ს კითხვაზე რამდენად სამართლიანი მათი ნაბიჯი, როდესაც ლგბტ თემი მათ პროტესტს მხარს აქტიურად უჭერდა, ამბობს, რომ "ის ადამიანები არა მათ აქციას, არამედ აქციის იდეას უერთდებოდნენ.

"ჩვენს აქციას კი არ უერთდებოდნენ, იმ თემას იზიარებდნენ ჩვენ რასაც ვფიქრობდით. რაც შეეხება მათ უფლებებსა და სამართლიანობას, ვფიქრობთ, რომ სრულიად სამართლიანი ჩვენი მოთხოვნა, რადგან ჩვენ პრაიდის იდეას ვეწინააღმდეგებით, თორემ ამ ადამიანებთან, ცალკეულთან, არაფერი საწინააღმდეგო არ გვაქვს. ჩვენ ვთქვით, რომ პრაიდის იდეა ისეთივე დამაზიანებელი მათთვის, როგორც დანარჩენი საზოგადოებისთვის, რადგან ეს ზრდის დაძაბულობას, პირდაპირ ეწინააღმდეგება სამოქალაქო ერთობას და ძალიან მძიმე მდგომარეობაში აყენებს ქვიარ ადამიანებს მათ შორის. ასე რომ, მე ვერ ვხედავ რამე საფუძველს ვინმეს რამე პრეტენზია ჰქონდეს ჩვენ მიმართ", — აცხადებს მუსელიანი.

დღეს თბილისში ღირსების მარში უნდა გაიმართოს, პარალელურად კი საპატრიაქრო კონტრაქციას მართავს. ჰომოფობიური და ძალადობრივი კონტრაქციის მონაწილეები ჟურნალისტებს თავს ესხმიან. ისინი ფიზიკურ და სიტყვიერ შეურაცხყოფას აყენებენ მედიის წარმომადგენლებს და უმტვრევენ მათ აპარატურას. არიან დაშავებულები.

თბილისი პრაიდის კვირეული დღეს, 5 ივლისს ღირსების მარშით დასრულდება. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.

დღეს ჰომოფობიური ჯგუფები პარლამენტის წინ, ქაშუეთის ეკლესიასთან და რუსთაველის თეატრთან არიან შეკრებილები და იმუქრებიან, რომ ღირსების მარშის ჩატარებას არ დაუშვებენ.

ამ კონტრაქციის მონაწილეები და ორგანიზატორები არიან: საპატრიარქო, მართლმადიდებელ მშობელთა კავშირი, პრორუსული ალტინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიჰყავთ ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

პრაიდს მხარდაჭერა გამოუცხადა საქართველოში აკრედიტებულმა არაერთმა საელჩომ, ასევე პარტნიორი ქვეყნების პოლიტიკოსებმა — კონგრესმენებმა და ევროპარლამენტარებმა. ასევე, პრაიდს მხარს უჭერენ სხვადასხვა ოპოზიციური პარტიის წარმომადგენელი პოლიტიკოსები. თუმცა, პრაიდს არ აქვს მმართველი გუნდის მხარდაჭერა. მათი ლიდერები ჰომოფობიურ და ძალადობის წამხალისებელ განცხადებებს ავრცელებენ და ამბობენ, რომ ღირსების მარშის ჩატარება მიზანშეწონილი არ არის.

ამავე თემაზე: