ევროპის რეკონსტრუქციისა და განვითარების ბანკმა - EBRD, თიბისი, საერთაშორისო ვაჭრობის ხელშეწყობისა და დაფინანსების მიმართულებით, კიდევ ერთხელ დაასახელა ყველაზე აქტიურ ბანკად საქართველოში. აღნიშნული ჯილდო თიბისიმ უკვე მეშვიდედ მიიღო. თიბისი EBRD-ის ვაჭრობის ხელშეწყობის პროგრამის წევრი 1999 წელს გახდა.

"ვაჭრობის დაფინანსების მიმართულებით, თიბისის ბაზრის წილი 52%-ია. კრიზისული წლის მიუხედავად, 2019 წელთან შედარებით, თიბისის პორტფელი 23%-ით გაიზარდა და დღეს ის 2 მილიარდ ლარზე მეტს შეადგენს. გამოწვევებითა და სირთულეებით სავსე პერიოდში, პარტნიორ კომპანიებს დავეხმარეთ, რომ ახალ რეალობას ეფექტურად მორგებოდნენ - გავუზარდეთ ტრანზაქციების ვადები. ასევე, ვაჭრობის დაფინანსების პროდუქტებზე სესხებთან შედარებით დაბალი საპროცენტო განაკვეთები მოქმედებს. სწორედ ამიტომ, კომპანიები შედარებით ნაკლები დანაკარგით გაუმკლავდნენ გამოწვევებით სავსე პერიოდს. თიბისის ვაჭრობის დაფინანსების პროდუქტებით ჯამში 1000-ზე მეტი მსხვილი, მცირე თუ საშუალო ბიზნესის და ასევე საერთაშორისო კომპანია სარგებლობს", — ამბობს გიორგი თხელიძე, თიბისის გენერალური დირექტორის მოადგილე.

აღნიშნული დაჯილდოება კიდევ ერთხელ უსვამს ხაზს ვაჭრობის დაფინანსების მნიშვნელობას, რომელმაც პანდემიის პირობებში, გადამწყვეტი როლი შეასრულა რეგიონული ვაჭრობის შენარჩუნებაში. პროგრამამ 2020 წელს რეკორდულ წლიურ მოცულობას მიაღწია და 3,3 მილიარდ ევროს გადააჭარბა.

"გამარჯვებული ბანკები ფინანსური სფეროს სამაგალითო წარმომადგენლები არიან. ისინი ამოძრავებენ საერთაშორისო ვაჭრობას, რომელიც ასე მნიშვნელოვანია გლობალური ეკონომიკური ზრდისა და კეთილდღეობისათვის. ვიცი, გლობალური პანდემიის დაწყების შემდეგ, როგორი ძალისხმევით მოუწიათ მათ მუშაობა და ისიც ვიცი, რომ ჩვენ ერთად დავძლევთ ამ კრიზისს", — EBRD-ის პრეზიდენტი, ოდილ რენოდ-ბასო

ღონისძიებაზე დიდი ყურადღება დაეთმო EBRD-ის მიერ კრიზისზე რეაგირებას. გასულ წელს EBRD-მა, ვაჭრობის დაფინანსების კუთხით, განსაკუთრებულად დაუჭირა მხარი ისეთ პროდუქტებს, როგორებიცაა: ბუნებრივი ენერგია, საკვები და სამედიცინო პროდუქტები.

"ვაჭრობის დაფინანსების პროგრამამ საკვანძო როლი შეასრულა მცირე და საშუალო საწარმოების ზრდაში, რაც ასე მნიშვნელოვანია სამუშაო ადგილების შექმნისთვის, ასევე საზოგადოებებში თანაბარი შესაძლებლობების განვითარებისათვის. ჩვენი ჯილდოს მფლობელი ბანკები წარმატებით იყენებენ EBRD-ის დაფინანსებასა და სასწავლო პროგრამებს. მათი წარმატება ჩვენთვის ძალიან საამაყოა”, — EBRD-ის მმართველი დირექტორი უკრაინაში, კავკასიაში, მოლდოვასა და ბელარუსში, ფრანსის მალიჟე.

ღონისძიების ერთ-ერთი მთავარი თემა კრიზისის დროს ციფრული პლატფორმების მნიშვნელობაც იყო, ვინაიდან პანდემიამ კიდევ ერთხელ გაუსვა ხაზი ციფრული შესაძლებლობებისა და გადაწყვეტების საჭიროებას. EBRD ხელს უწყობს პარტნიორ ბანკებს არ დარჩნენ ციფრული ტრანსფორმაციის მიღმა.

ვაჭრობის დაფინანსების პროგრამის ფარგლებში, EBRD-მა დღემდე მხარი 27 000-მდე სავაჭრო ტრანზაქციას დაუჭირა. ჯამში, ტრანზაქციების რაოდენობამ 22 მილიარდ ევროს გადააჭარბა.