ქართული ოცნების დეპუტატი, ლადო კახაძე აცხადებს, რომ თბილისი პრაიდმა ღირსების მარშის გასამართი ადგილი სხვებს უნდა შეუთანხმოს. დეპუტატი ამტკიცებს, რომ მომხრეა ადამიანებმა გამოხატონ თავისი ნება, მაგრამ ამავდროულად, ჰომოფობიური მოტივით აცხადებს, რომ უამრავი ადგილია თბილისში "სადაც შეიძლება ამის გაკეთება", შერჩეული სივრცე ანუ რუსთაველის გამზირი კი "მიუღებელია".

"მე მაგალითად, სიმართლე გითხრათ, ადამიანის უფლებრივ ნაწილში, მომხრე ვარ, რომ გამოხატონ თავისი ნება, მაგრამ ის ადგილი, რომელიც მათ აქვთ შერჩეული, ჩემთვის შეიძლება მიუღებელი იყოს.

საერთოდ, ადგილის შერჩევა, კონსენსუსის საგანი უნდა იყოს და არის უამრავი ადგილი თბილისში, სადაც შეიძლება ამის გაკეთება.

ადამიანის უფლებრივი ნაწილი ყოველთვის გადის ორ ნაწილზე: ერთი, როდესაც მე მაქვს უფლება და მეორე, როდესაც სხვის უფლებას პატივი უნდა ვცე და ეს შეთანხმებული უნდა იყოს", — განუცხადა მან მთავარ არხს.

ქართული ოცნების წევრებს ამ დრომდე არ უხსენებიათ, რომ რუსთაველის გამზირზე არ უნდა გამოდიოდნენ პრორუსული, ქსენოფობიური და ძალადობრივი ჯგუფები, მაშინ, როცა ამბობენ, რომ პრაიდმა სხვა სივრცე უნდა აირჩიოს.

კახაძის მსგავსად ამ არგუმენტს წლების განმავლობაში იყენებდნენ სხვადასხვა ჰომოფობიური ჯგუფები. ისინი უკრძალავდნენ ლგბტ თემს რუსთაველის გამზირზე გასვლას და ამტკიცებდნენ, რომ იმ ტერიტორიაზე, სადაც წინაპრები თავისუფლებისთვის იბრძოდნენ, ყველა არ უნდა გამოდიოდეს. ამ ჰომოფობიური განცხადების მიზანი ლგბტ თემის დამცირება და მათთვის გამოხატვის თავისუფლების შეზღუდვა იყო.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.