29 ივნისს საქართველოს პარლამენტის ეროვნული ბიბლიოთეკის საგამოფენო დარბაზში რეზო გაბრიაძის სახელობის კინობიბლიოთეკისა და კინოდარბაზის პრეზენტაცია ჩატარდა. 29 ივნისს რეზო გაბრიაძეს 85 წელი შეუსრულდებოდა.

ფოტო: საქართველოს პარლამენტის ეროვნული ბიბლიოთეკა

რეზო გაბრიაძის მოთხრობაში თეთრი ხიდი არის პერსონაჟი ვირთხა იპოლიტე, რომელსაც მწერალი ასე აღწერს: "იმ წლებში ჩვენს ქალაქში ერთი ვირთხა ცხოვრობდა,იპოლიტეს ეძახდნენ, რადგან ოდესღაც მსახიობ ხვიჩიას დაუმდუღრავს. სად არ შეგხვდებოდათ ეს იპოლიტე: ქუთვაჭრობასთან, ლომბარდთან, ბაზართან, ბანკთან, გრუზვტორსირიოსთან - იისფერი, გრძელი მწვანე კუდით მართლაც ძნელი შესახედი იყო. #6 ბიბლიოთეკაში მხოლოდ მე და იპოლიტე დავდიოდით. იმ ხანებში ორივე კლასიკოსებით ვიყავით გატაცებული: იპოლიტე ყდებით, მე კი — რაც მას დარჩებოდა".

მსოფლიო ლიტერატურის ეს დიდი გურმანი, ვირთხა იპოლიტეა გამოსახული რეზო გაბრიაძის კინობიბლიოთეკის კარებთან და ერთგვარად "ხსნის" კინოლიტერატურის კარს.

გაბრიაძის ოჯახმა ეროვნულ ბიბლიოთეკას გადასცა ბატონი რეზოს არქივი, რომელშიც ინახება: წიგნები — შერეკილები, ექიმი და ავადმყოფი, პუშკინის მუზეუმის მიერ გამოცემული სამხატვრო ალბომი, ბატონი რეზოს მიერ ილუსტრირებული გამოცემები. ოჯახი ბიბლიოთეკას ასევე გადასცემს უნიკალურ ფოტოარქივს, რომელმაც შემოგვინახა კადრები ფილმების გადასაღები მოედნებიდან. ბიბლიოთეკას უკვე გადაეცა ბატონი რეზოს სცენარების მიხედვით გადაღებული ფილმების აფიშები, რომლებიც გაციფრულდა და კინოდარბაზის კედლებისთვის საინტერესო კოლაჟები შეიქმნა.

საგამოფენო დარბაზში წარმოდგენილი იყო ეროვნული ბიბლითეკის ფონდებში დაცული რეზო გაბრიაძის გამოცემები, რომელთა შორისაა არ იდარდოს და არაჩვეულებრივი გამოფენის სცენარები. ასევე წარმოდგენილი იყო კიდევ ერთი უნიკალური ექსპონატი - ფილმ შერეკილების პირველი პლაკატი, რომელიც შემდეგ ეროვნული ბიბლიოთეკის ფონდში გადაინაცვლებს.