ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, მიხეილ სარჯველაძეს სწამს, რომ სახელმწიფო უზრუნველყოფს მოქალაქეთა უსაფრთხოებას ღირსების მარშის დროს.

"ამისთვის, რომ უსაფრთხოება იყოს დაცული ყველასი, მათ შორის, ვინც ახორციელებს გამოხატვის თავისუფლების ფარგლებში რაიმე აქტივობას, რასაკვირველია, ეს არის ხელისუფლების ვალდებულება და საამისოდ, რა თქმა უნდა, ყველა ზომა უნდა იქნას მიღებული. მე მწამს, რომ ეს ასეც იქნება", — განაცხადა მიხეილ სარჯველაძემ.

დეპუტატი ამბობს, რომ მოქალაქეთა უსაფრთხოების დაცვისთვის განსაკუთრებული როლი შინაგან საქმეთა სამინისტროს აქვს.

"შინაგან საქმეთა სამინისტროს აქვს, რა თქმა უნდა, განსაკუთრებული როლი და ფუნქცია ამ მიმართულებით და რასაკვირველია, რომ ის არის, ყველა შემთხვევაში, მოწოდების სიმაღლეზე საიმისოდ, რომ ეს უსაფრთხოება უზრუნველყოს", — განაცხადა მიხეილ სარჯველაძემ.

გუშინ, რესპუბლიკური პარტიის თავმჯდომარემ, ხათუნა სამნიძემ სარჯველაძეს ოფიციალურად მიმართა, პრაიდის კვირეულის ფარგლებში დაგეგმილი აქტივობების უსაფრთხოებაზე სასაუბროდ კომიტეტზე მოიწვიოს შინაგან საქმეთა მინისტრი, ვახტანგ გომელაური. სარჯველაძემ On.ge-ს უთხრა, რომ წერილი მიიღო, თუმცა იგი "არ იყო აკურატულად შედგენილი". მისივე თქმით, დაზუსტებების შემდეგ დაიწყებს საკითხზე მუშაობას, თუმცა არ არის დარწმუნებული, მოესწრება თუ არა მინისტრის საკომიტეტო მოსმენა უშუალოდ ღირსების მარშამდე.

5 ივლისს Tbilisi Pride ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

გაიგე მეტი: