გირჩის ერთ-ერთი ლიდერი, ვახტანგ მეგრელიშვილი ღირსების მარშთან დაკავშირებით ამბობს, რომ სიტყვის თავისუფლება არ არის სადღეგრძელოების დასაცავი და სახელმწიფოს ფუნქციაა უმცირესობების დაცვა.

"სხვა ფუნქცია ამ ქვეყანაში სახელმწიფოს არ გააჩნია, რაც არ უნდა მიუღებელი ადამიანები გამოდიოდნენ ქუჩაში და რაც არ უნდა მიუღებელ რამეებს ამბობდნენ იმიტომ, რომ სიტყვის თავისუფლება, ზოგადად, არ არის სადღეგრძელოების დასაცავი, ანუ სადღეგრძელოების დაცვა არ სჭირდება. სადღეგრძელოების მთქმელ ადამიანებს ტაშს უკრავენ, ანუ იმ ადამიანებს აქვთ საფრთხის განცდა და საშიშროება. ვინც ისეთ რამეს ამბობს, რაც უმრავლესობას ნებისმიერ საზოგადოებაში, არამარტო საქართველოში, არ მოსწონს, ეს არის ჩვენი კონსტიტუცია, რომ თუ სახელმწიფოს შეუძლია უმცირესობების, რაც არ უნდა მიუღებელი იყოს უმცირესობა უმრავლესობისთვის, დაცვა, ის თავის ფუნქციას ასრულებს. თუ ამის შესრულება არ შეუძლია, ის თავის ფუნქციას ვერ ასრულებს, მიუხედავად იმისა, ამ მხარეს, უმცირესობების მხარეს რომელი პოლიტიკური ძალები აღმოჩნდებიან და ვინ შეეცდება ამ აქციის საკუთარი პოლიტიკური მიზნებისთვის გამოყენებას", — აცხადებს მეგრელიშვილი.

მისივე თქმით, გირჩის პოზიცია ძალადობასთან დაკავშირებით ის არის, რომ ნებისმიერ ადამიანს უნდა შეეძლოს ქვეყანაში თავი დაცულად იგრძნოს.

"თქვენ იცით, ალბათ, გირჩის პოზიცია როგორია ძალადობასთან დაკავშირებით. ერთადერთი მთავარი პრობლემა, რომელიც ჩვენ გვაქვს, არის ძალადობა. ასევე, ნებისმიერ ადამიანს უნდა შეეძლოს ამ ქვეყანაში თავისუფლად, ძალადობისგან დაცულად გრძნობა, მაგრამ ფაქტია, რომ 2013 წელს, როდესაც პირველად მოხდა დაპირისპირება ამ ჯგუფებს შორის, ასეთი კონფლიქტი ჩვენს ქვეყანაში, სამწუხაროდ, არსებობს და ამ კონფლიქტის გამოყენება პოლიტიკური მიზნით, ალბათ, არის ყველაზე ცუდი, რაც ჩვენ შეიძლება, ზოგადად, გავაკეთოთ და ახლა რაც ეტყობა, რა სიტუაციაც არის, ამ მხარეებს, როგორც ერთ მხარეს, ლგბტ თემს, რომელიც ნაწილი პოლიტიკოსების უჭერს მხარს და მეორე ნაწილს საზოგადოების, რომელიც ეწინააღმდეგება ამ აქციას, ხელისუფლება უჭერს მხარს, როგორც ჩანს, როგორც ყოველ შემთხვევაში ჩვენ გვრჩება ასოციაცია. ჩემი აზრით, მთავარი ამბავი არის ის, რომ ნებისმიერი აქცია, რომელიც შეიძლება ქვეყანაში ჩატარდეს, იყოს დაცული სახელმწიფოს მიერ ძალადობისგან", — ამბობს გირჩის ლიდერი.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართელი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.