რესპუბლიკური პარტიის ლიდერს, ხათუნა სამნიძეს სურს შინაგან საქმეთა მინისტრი, ვახტანგ გომელაური ადამიანის უფლებათა დაცვისა და სამოქალაქო ინტეგრაციის კომიტეტის მორიგ სხდომას დაესწროს და პრაიდის კვირეულის ფარგლებში დაგეგმილი აქტივობების უსაფრთხოებაზე კითხვებს უპასუხოს.

აღნიშნულზე განცხადება სამნიძემ კომიტეტის თავმჯდომარეს, მიხეილ სარჯველაძეს მისწერა. განცხადების ავტორის სურვილია, რომ შინაგან საქმეთა მინისტრმა უპასუხოს კითხვებს იმაზე, თუ რამდენად იქნება დაცული აქტივისტებისა და მათი მხარდამჭერების გამოხატვის თავისუფლება პრაიდის კვირეულის ფარგლებში.

მიხეილ სარჯველაძე On.ge-თან საუბრისას ამბობს, რომ ოპოზიციის წარმომადგენლებს, რომლებმაც მას პრაიდის გამართვის საკითხზე შს მინისტრის პარლამენტში დაბარების თხოვნით მიმართეს, ჰქონდათ ინფორმაცია, რომ ტექნიკურ საკითხებზე მოლაპარაკება დღეს დაიწყებოდა და შესაბამისად, ამ დროისთვის საკითხი გადაწყვეტილი ვერ იქნებოდა.

"თვითონ მან რა გითხრათ, ვინც ეს ინფორმაცია მოგაწოდათ? არ გვქონია ჩვენ ერთმანეთში მოლაპარაკება, რომ 28 ივნისის კვირაში დავიწყებთ ამაზე მუშაობასო? არ უთქვამს ეს? სამწუხაროა. ასე ვიყავით შეთანხმებული. ეს წერილი ნამდვილად წინა კვირაში შემოვიდა, მაგრამ დასაზუსტებელი იყო, არ იყო აკურატულად შედგენილი. დააზუსტეს შემდეგ და ამის მერე გვქონდა მოლაპარაკება, რომ კვირაში დავიწყებთ მუშაობას, რათა შევთანხმდეთ, როგორ და რა ფორმატში ჩავატარებთ ამ შეხვედრას", — განაცხადა მიხეილ სარჯველაძემ.

ამასთან, როგორც მან აღნიშნა, არ იცის, მოესწრება თუ არა მინისტრის მოსმენა პრაიდის კვირეულის დაწყებამდე, რადგან "ამის ვალდებულება არ არის, რომ მაინცდამაინც 5-მდე უნდა მოესწროს".

თბილისში პრაიდის კვირეული 1 ივლისიდან არის დაგეგმილი.