პარლამენტის დეპუტატმა, ტარიელ ნაკაიძემ პარლამენტის ტრიბუნიდან მრავალფეროვან საქართველოსა და მის მნიშვნელობაზე ისაუბრა. მან პრემიერმინისტრს მიმართა და თქვა, რომ არ მისცემს უფლებას საქართველოში მცხოვრები უმცირესობები "მეორეხარისხოვან მოქალაქეებად მონიშნონ".

"არ მოგცემთ უფლებას, რომ უმცირესობები მხოლოდ უსაფრთხოების ჭრილში განიხილოთ. საქართველო ჩვენი სამშობლოა და ჩვენ მეტი სამშობლო არ გვაქვს. შევეჯიბროთ საქართველოს პატრიოტიზმსა და მის სიყვარულში. მე მინდა ბოდიში მოვუხადო საქართველოს მოსახლეობას, ჩემი ემოციური გამოსვლის გამო, მაგრამ, სამწუხაროდ ბატონო პრემიერო თქვენ მეტი გზა არ დამიტოვეთ. დაე, გაუმარჯოს, მრავალფეროვან თავისუფალ საქართველოს. ღმერთმა დალოცოს საქართველო", — განაცხადა ნაკაიძემ.

პრემიერის ყოველწლიური მოხსენების დროს სიტყვით გამოსვლისას ნაკაიძემ აღნიშნა, რომ ის პარლამენტში უმცირესობების ხმაა და აღნიშნა, რომ ქართველი მუსლიმია.

"მე ვეფხისტყაოსნის გმირის, ტარიელის სახელს ვატარებ. მე დიდი ქართველი მამულიშვილების — მემედ აბაშიძის, სელიმბეგ ხიმშიაშვილის, გულო კაიკაციშვილის, საიათნოვას, ილია ჭავჭავაძის, აზერბაიჯანელი ქალის ფარიხან სოფიევას, რომელიც ასი წლის წინ პირველი დემოკრატიული საქართველოს ღირსებას იცავდა სწორედ ამ ტრიბუნიდან. მათი შთამომავალი ვარ.

მე დღეს საქართველოს უმცირესობების ხმა ვარ აქ. მე, ბატონო პრემიერო, ქართველი მუსლიმი ვარ. დიახ, მინდა კარგად იცოდეთ, ბატონო პრემიერო, რომ ქართველი მუსლიმი ვარ", — განაცხადა ნაკაიძემ.