ყოფილი პრემიერმინისტრი, გიორგი გახარია ამბობს, რომ საქართველოში ჯერ კიდევ იმ ვაქცინით იცრებიან, რომელიც მისი მოლაპარაკებების შედეგად შემოვიდა ქვეყანაში. ამის შესახებ მან ამერიკის ხმასთან ინტერვიუს დროს ისაუბრა.

ყოფილ პრემიერს ჰკითხეს, რა გააკეთა იმისათვის, რომ მოსახლეობის აცრა შესაძლებელი ყოფილიყო. როგორც გახარია ამბობს, საქართველო იყო ერთ-ერთი პირველი ქვეყანა, რომელმაც COVAX-ისგან ვაქცინა მიიღო და რომელმაც მწარმოებლებთან პირდაპირი კომუნიკაცია დაიწყო. ჟურნალისტმა ისრაელის პრემიერმინისტრის, ბენიამინ ნეთანიაჰუს მაგალითი მოიყვანა, რომელიც პირადად იყო ჩართული ვაქცინის მოპოვებაში, რაზეც გახარიამ თქვა, რომ ისიც ასე იქცეოდა.

"დღეს იცით, რა ვაქცინებია დარჩენილი და რა ვაქცინებით იცრება საქართველოში ხალხი? აი, მე რომ მოველაპარაკე და დავაკონტრაქტე ჯერ კიდევ იმ ვაქცინებით იცრება ხალხი, ახალი არაფერი შემოსულა. ეს გავაკეთე, უფრო მეტს გავაკეთებდი, მაგრამ ეს არ ნიშნავს, რომ ამაზე მე და თქვენ უნდა ვლაპარაკობ", — განაცხადა გახარიამ.

ამასთან, მან ქართულ ოცნებას ვაქცინაციის პროცესში წარმატებები უსურვა და თქვა, რომ ეს საკითხი ზეპარტიულია.