საერთაშორისო გამჭვირვალობა-საქართველოს (TI) განცხადებით, სენაკის მუნიციპალიტეტში "მბრუნავი კარის" შემთხვევა გამოავლინეს. TI-ის ცნობით, "მბრუნავი კარი" საჯარო და კერძო სექტორებს შორის ინტერესთა კონფლიქტისა და კორუფციის რისკების შემცველი სამსახურეობრივი გადაადგილებაა, რომელსაც ორგანიზაცია პერიოდულად იკვლევს.

არასამთავრობო ორგანიზაციის განცხადებით, ამჯერად მსგავსი ფაქტი სენაკის მერიის ადმინისტრაციული სამსახურის უფროსთან, ნანა ზარანდიასთან მიმართებაში გამოიკვეთა.

"ნანა ზარანდია 2014 წლიდან სენაკის მერიის იურიდიული სამსახურის უფროსი იყო, 2018 წლიდან კი ადმინისტრაციული სამსახურის უფროსი გახდა. 2019 წლის 8 თებერვალს ზარანდია მერიიდან წავიდა და სს "არქეოპოლისის" დირექტორად დაინიშნა, სადაც 2020 წლის 12 ივნისამდე მუშაობდა. სწორედ ამ პერიოდში კომპანიამ სენაკის მუნიციპალიტეტის 6 ტენდერი მოიგო და 1 გამარტივებული შესყიდვაც მიიღო. ხელშეკრულებების ჯამური ღირებულება 6 054 373 ლარია. შვიდივე ხელშეკრულებას "არქეოპოლისის" მხრიდან ხელს კომპანიის დირექტორი, ნანა ზარანდია აწერს", — აცხადებენ TI-ში.

ორგანიზაციის ინფორმაციით, შემდგომ ნანა ზარანდია სენაკის მერიაში ადმინისტრაციული სამსახურის უფროსის პოზიციაზე კვლავ დაბრუნდა.

"სწორედ ადმინისტრაციული სამსახურის დაქვემდებარებაშია შესყიდვების განყოფილება, რომლის ძირითადი ფუნქცია მუნიციპალური შესყიდვების ორგანიზებაა. ამის შემდეგ სს "არქეოპოლისმა" სენაკის მუნიციპალიტეტის ორი ტენდერი მოიგო, ხელშეკრულებების ჯამური ღირებულებით 3 874 513 ლარი. ორივე შემთხვევაში ნანა ზარანდია ხელს აწერს ოქმს, რომ არ აქვს ინტერესთა კონფლიქტი სს არქეოპოლისთან", — ნათქვამია TI-ს განცხადებაში.

მათივე თქმით, "არქეოპოლისი" ერთ-ერთი ყველაზე დიდი სამშენებლო კომპანიაა სამეგრელოს რეგიონში. იგი შესყიდვებში 2011 წლიდან მონაწილეობს და ტენდერებიდან და გამარტივებული შესყიდვებიდან 122 მილიონ ლარზე მეტი ღირებულების კონტრაქტები აქვს მიღებული.

ორგანიზაციის განცხადებით, "არქეოპოლისისგან" ყველაზე ხშირად მომსახურებას სწორედ სენაკის მუნიციპალიტეტი ყიდულობს.

"არქეოპოლისმა სენაკის მუნიციპალიტეტის 26 ტენდერი მოიგო, ასევე, მიიღო 2 გამარტივებული შესყიდვაც. "არქეოპოლისი" საქართველოს პარლამენტის ყოფილი წევრის, დემურ გადელიას კომპანიაა. გადელია პარლამენტის წევრი (სენაკის მაჟორიტარი) ორჯერ იყო 1995-1999 და 1999-2004 წლებში", — ვკითხულობთ საერთაშორისო გამჭვირვალობა-საქართველოს განცხადებაში.

TI სახელმწიფო უსაფრთხოების სამსახურის ანტიკორუფციულ სააგენტოს მოუწოდებს, ნანა ზარანდიას ჩართულობით "არქეოპოლისის" სენაკის მუნიციპალიტეტის ტენდერებში მონაწილეობის პროცესი შეისწავლოს და დაადგინოს, შეიცავს თუ არა იგი კორუფციის შესაძლო ნიშნებს.