ოკუპირებული ცხინვალის იზოლატორში უკანონო პატიმრობაში მყოფ ზაზა გახელაძის ოჯახი ცხინვალში აღარ გადავა. გახელაძის მამამ ჟურნალისტებთან თქვა, რომ გადაწყვეტილება საქართველოს პატრიარქის ილია მეორისა და ოჯახის თხოვნის შედეგად შეცვალა. თუმცა, მიშა გახელაძის თქმით, დღეს დაანონსებული აქცია გაიმართება.

"თანახმა ვიყავი ყოველ მიზეზს გარეშე ჩემი ოჯახით უნდა გადავსულიყავი. დიდი თხოვნით მოვიდნენ გორის მეუფეები. გვითხრეს, რომ დაწერეს წერილი, გადასცეს ჩვენს დიდ უწმინდეს და უნეტარესს. მისგან დიდი თანაგრძნობა მოვიდა რომ დაგვიდგებოდა გვერდში და რამენაირად შედეგს გამოიღებდა. დღემდე არ ვარ დარწმუნებული, არ ვიცი რა რწმენით უნდა ვიყო, როგორ უნდა გადავიფიქრო ეს, მაგრამ დიდ პატივს ვცემ უწმინდესს, არ გადავდივარ მაგის გამო", — ამბობს მიშა გახელაძე.

მან, ასევე, აღნიშნა, რომ ერგნეთის მომდევნო ინციდენტების პრევენციისა და მათზე რეაგირების მექანიზმის (IPRM) შეხვედრაზე თუ კონკრეტული შედეგი არ დადგა, ოკუპირებულ ცხინვალში ოჯახით აუცილებლად გადავა.

ზაზა გახელაძის მამა ამბობდა, რომ შექმნილი მდგომარეობისა და ცოლის თვითმკვლელობის მცდელობის გამო აქციების მოწყობა და ერგნეთში გადასვლა გადაწყვიტეს, რათა შვილის გასათავისუფლებლად ყურადღება ამ ფორმით მაინც მიიქციონ.

11 ივლისს ერთი წელი გავა მას შემდეგ, რაც ზაზა გახელაძე რუსმა სამხედროებმა დაატყვევეს. ის კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: