აშშ-ის ელჩის, კელი დეგნანის განცხადებით, ფართო დებატემამდე მოსამართლეების დანიშვნის პროცესი უნდა შეჩერდეს და მისივე თქმით, ეს 19 აპრილის შეთანხმებით არის განსაზღვრული.

"ჩემ მოწოდებებზე მნიშვნელოვანი, რა თქმა უნდა, არის ის ვალდებულება, რაც პოლიტიკურმა პარტიებმა აიღეს 19 აპრილის შეთანხმებით. აქ არის განსაზღვრული ის, რომ უნდა მოხდეს ნებისმიერი დანიშვნის შეჩერება, სანამ არ იქნება მიღებული რეფორმები სასამართლო სისტემის გასაუმჯობესებლად, ხოლო ამისთვის აუცილებელია ინკლუზიური ფართო დებატები და დისკუსია, რა სახის სასამართლო რეფორმა უნდა განხორციელდეს. სანამ ასეთი დებატები და ფართო განხილვები მოხდება, მანამდე რა თქმა უნდა, უნდა შეჩერდეს ეს პროცესი. საქართველოს კონსტიტიცია ამბობს, რომ სასამართლო სისტემა უნდა იყოს დამოუკიდებელი", — განაცხადა ამერიკის ელჩმა.

როგორც დეგნანმა აღნიშნა, ეს არის პირობა ქართველი ხალხის მიმართ, შესაბამისად, პარლამენტმა უნდა შეასრულოს თავისი ვალდებულება და კონსტიტუციის მოთხოვნის თანახმად იმოქმედოს.

"როგორც შეთანხმებაში იყო მოცემული, პირველ რიგში, უნდა შეფასდეს ის მიღწეული, განხორციელებული რეფორმები, შემდგომ გაიმართოს დებატები და მსჯელობა ამ საკითხზე იმისათვის, რომ საქართველოს მოსახლეობა იყოს დარწმუნებული, რომ სასამართლო სისტემა იყოს ძლიერი. ისეთი ძლიერი და დამოუკიდებელი, როგორსაც ამას კონსტიტუცია მოითხოვს. შესაბამისად, ეს საკითხები ყველამ უნდა მიიღოს ძალიან სერიოზულად. მე ადრეც აღვნიშნე, რომ ის შეფასება, თითქოს მოსამართლეების დანიშვნა არდანიშვნა გამოიწვევს სისტემის ამ ეტაპზე ჩამოშლას, ეს ასე არ არის, იმიტომ რომ სასამართლოს ჰყავს საკმარისი რაოდენობა მოსამართლეების და სრულიად შესაძლებელია, რომ ამ პროცესის შეჩერება განხორციელდეს", — აცხადებს კელი დეგნანი.

17 ივნისს იუსტიციის უმაღლესმა საბჭომ პარლამენტს უზენაესი სასამართლოს მოსამართლეობის 9 კანდიდატს წარუდგინა. კერძოდ, გიორგი გოგიაშვილი, გოჩა აბუსერიძე, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე, ლაშა გოჩიაშვილი. საბჭოს არამოსამართლე წევრი, ნაზი ჯანეზაშვილი On.ge-სთან დადებითად აფასებს ქეთი მესხიშვილისა და ეკა ზარნაძის წარდგენას, თუმცა ამბობს, რომ ამ მოდელით უმრავლესობაში კვლავ ე.წ. კლანი რჩება, კარგი მოსამართლეები კი — უმცირესობაში.

აღსანიშნავია, რომ შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.