ქართული ოცნების დეპუტატის, გია ვოლსკის განცხადებით, ურჩევნია რუსთაველის თეატრის დასი "ბუკინგემში წავიდეს და არა მოსკოვში", მაგრამ მისი აზრით, ქართული თეატრის "ინტელექტუალური დონის" დემონსტრირება რუსეთშიც უნდა მოხდეს.

"რაც შეეხება რუსთაველი თეატრს, რასაკვირველია, დამოუკიდებელ გადაწყვეტილებებს ღებულობს, ყველა ადამიანს თავისი მოსაზრება გააჩნია. მე მირჩევნია, მაგალითად, ბუკინგემში წავიდნენ და არა მოსკოვში. მაგრამ, როდესაც ჩეხოვის საერთაშორისო ფესტივალს ეხება საკითხი, მინდა ვთქვა შემდეგი — რომ საერთოდ, ქართული თეატრის, მისი ინტელექტუალური დონის, ჩვენი კულტურული დონის დემონსტრირება უნდა მოხდეს, მათ შორის, რუსეთის ფედერაციაში და არა მარტო რუსული საზოგადოების განსახილველად და მათ თვალსაწიერში იმ თემების წამოსაწევად, რაც საქართველოს ახასიათებს მაღალი კულტურული დონე", — განაცხადა ვოლსკიმ.

20 ივნისს ცნობილი გახდა, რომ რუსთაველის თეატრის დასი მოსკოვში ფესტივალზე გაემგზავრება. ამის შესახებ თეატრის ხელმძღვანელმა, რობერტ სტურუამ რუსულ არხთან განაცხადა. მისივე თქმით, მნიშვნელოვანია მოსკოველ მაყურებელს მათი სპექტაკლი აჩვენონ.

"ჩვენთვის ძალიან სასიამოვნოა, რომ მოსკოველ მაყურებელს შეგვიძლია ვაჩვენოთ ჩვენი ერთ-ერთი ბოლო სპექტაკლი. არაჩვეულებრივი პიესაა, არაჩვეულებრივი ავტორი და ჩემი აზრით, მსახიობებიც ცუდად არ თამაშობენ", — თქვა სტურუამ.

თეატრის ერთ-ერთი მსახიობის, ნანა ფაჩუაშვილის თქმით კი, რუს მაყურებელზე იმედს ამყარებენ, რადგან მათ "მოსმენა უყვართ".

"ახლა, როცა ასეთ რთულ პიესას ვთამაშობთ, იმედს რუს მაყურებელზე ვამყარებთ, რადგან რუს მაყურებელს მოსმენა, დაფიქრება უყვარს", — თქვა მან.

როგორც რუსთაველის თეატრში On.ge-ს განუცხადეს, დასი ჩეხოვის ფესტივალზეა მიწვეული. ჩეხოვის ფესტივალის ვებგვერდზე განთავსებული განრიგის მიხედვით კი, რუსთაველის თეატრის დასი სპექტაკლებს 30 ივნისს, პირველ და 2 ივლისს გამართავს.

გაიგე მეტი: