ბაჩანა შენგელიამ 20 ივნისის აქციაზე სიტყვით გამოსვლისას პროკურატურას მიმართა და განაცხადა, რომ არ უნდა უწყებამ, რომელიც "მდაბიო და ცინიკურ" საქციელზე მიდის, დედამისის საქმე გამოიძიოს, ამიტომ საქმის გამოძიების შეწყვეტა მოსთხოვა.

"მე არ მჭირდება, როგორც ია კერზაიას შვილს, რომ თქვენმა ბინძურმა პოლიტიკური დაკვეთების შემსრულებელმა ორგანომ, რომელმაც ორი დღის წინ გამოაცხადა — როცა იქ უმძიმეს დანაშაულს ჩვენ პირდაპირ ეთერში ვისმენდით, ეს იყო ბატონი ივანიშვილის შვილის და პრემიერმინისტრის ჩანაწერი, უმძიმეს დანაშაულზე ვისმენდით — თქვა, რომ იქ მინისტრებზე კი არ საუბრობდნენ, საუბრობდნენ მილისტებზეო. მე არ მინდა, აი, ამ პროკურატურამ, რომელიც ასეთ მდაბიო და ცინიკურ საქციელზე მიდის, დედაჩემის არათუ საქმე გამოიძიოს, უბრალოდ სახელი და გვარიც არ მინდა, რომ ახსენოს. ამიტომ, მე ვთხოვ მათ შეწყვიტონ. არ მინდა მე ამ განცხადების განხილვა და მე შევწირავ ჩემ სიცოცხლეს, მაგრამ საბოლოოდ მაინც გამოვიძიებ ამ საქმეს. იქ უკვე თავისუფალი სასამართლო და პროკურატურა გაგასამართლებთ თქვენ, ბატონო გახარია. ამას აუცილებლად მივაღწევთ", — თქვა მან.

2019 წლის 23 აგვისტოს პროკურატურამ განცხადება გაავრცელა, რომ ია კერზაიას გარდაცვალების საქმეზე გამოძიება შეწყდა. საგამოძიებო უწყება ამის მიზეზად "დანაშაულის არარსებობას" ასახელებდა. შენგელიამ უწყებას საქმის გამოძიების შესახებ ხელახლა მიმართა.

ია კერზაიას გარდაცვალების საქმე

ზუგდიდის სკოლის დირექტორი, ია კერზაია ინსულტის დიაგნოზით საავადმყოფოში გადაიყვანეს, თუმცა მისი გადარჩენა ვერ მოხერხდა და ის 9 დეკემბერს გარდაიცვალა.

მანამდე ია კერზაია რუსთავი 2-თან ჰყვებოდა, რომ მას შემდეგ რაც არჩევნებში პედაგოგების ჩართვაზე უარი თქვა, ანონიმური წერილის საფუძველზე სკოლაში გენერალური ინსპექციის ორი თანამშრომელი ჩავიდა და სკოლა შეამოწმა. რუსთავი 2-ის ინფორმაციით, შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი. ამ მიზეზის გამო კი თანამდებობიდან დირექტორის გათავისუფლებას აპირებდნენ.

სკოლის დირექტორზე ზეწოლაზე საუბრობენ გარდაცვლილის ოჯახის წევრები და ოპოზიცია. აღნიშნულ საკითხს გამოეხმაურა განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი და აღნიშნა, რომ ამ საქმის პოლიტიზირება მიუღებელია.