დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, საქართველოში ინდური შტამის კიდევ ორი შემთხვევა გამოვლინდა. მის კომენტარს საზოგადოებრივი მაუწყებელი ავრცელებს.

"18 შემთხვევის შემდეგ, დადასტურდა კიდევ ორი შემთხვევა, ანუ სულ 20 შემთხვევა გვაქვს. მოგეხსენებათ, ბრიტანეთში დაახლოებით ორიდან სამ თვემდე დასჭირდა, რომ მთლიანად ჩაანაცვლოს ტრადიციული და შემდეგ ბრიტანული შტამი. განმასხვავებელი კლინიკური ნიშანი ინდურ შტამს, ან სხვა შტამს არ აქვს. გახლავთ ერთადერთი ის, რომ ბრიტანული და ინდური შტამი ვრცელდება შედარებით სწრაფად", — განაცხადა გამყრელიძემ.

16 ივნისს ჯანდაცვის მინისტრმა, ეკატერინე ტიკარაძემ განაცხადა, რომ საქართველოში ინდური შტამის სავარაუდო მოცულობა 8%-ია. ინდური შტამი ქვეყანაში 27 მაისს დაფიქსირდა. როგორც NCDC-ში ამბობდნენ, ინდური შტამი დაუფიქსირდა ქვეყანაში შემოსულ 5 მოგზაურს, მათგან 2 საქართველოს მოქალაქე იყო.