საქართველოს ჟურნალისტური ეთიკის ქარტიის აღმასრულებელი დირექტორი, ნატა ძველიშვილი ამბობს, რომ მას იმედი აქვს უზენაესი სასამართლოს გადაწყვეტილება არ დატოვებს იმ კითხვის ნიშნებს, რომლებიც პირველ და მეორე ინსტანციაში დარჩა. მისივე თქმით, უზენაეს სასამართლოს მძიმე გადაწყვეტილების მიღება მოუწევს და მნიშვნელოვანია ეს გადაწყვეტილება იყოს კანონიერი:

"მე მაქვს დიდი იმედი, რომ უზენაესი სასამართლო კარგად გააცნობიერებს, თუ რა მნიშვნელოვანია მის მიერ მიღებული გადაწყვეტილება. ამ გადაწყვეტილებით გაეცემა პასუხი კითხვის ნიშნებს, თუ რა მდგომარეობაშია დღეს სასამართლოს დამოუკიდებლობა, მედიის მდგრადობა, ბიზნესის მდგრადობა ქვეყანაში," - აღნიშნა ძველიშვილმა, რომელიც საქართველოს უზენაეს სასამართლოს შენობასთან რუსთავის 2-ის მხარდასაჭერ აქციაზე მივიდა.

მისი თქმით, საერთაშორისო საზოგადოება აკვირდება რუსთავი 2-ის საქმის მიმდინარეობას და თუ გადაწყვეტილება უნდობლობას გამოიწვევს, ეს ხელს შეუშლის სხვა მნიშვნელოვანი პროცესების განვითარებას.

ტელეკომპანია რუსთავი 2-ის მხარდასაჭერი აქციის მონაწილეებმა საქართველოს უზენაესი სასამართლოს შენობასთან შეკრება უკვე დაიწყეს. სასამართლოს დიდი პალატა დღეს ტელეკომპანიის საქმეზე იწყებს მსჯელობას