ნაციონალური მოძრაობის ერთ-ერთი წევრის, რომან გოცირიძის განცხადებით, ლარი "იქით-აქეთ ივლის", სანამ ადგილობრივი არჩევნები არ ჩატარდება. ამის შესახებ მან TV პირველის ეთერში ისაუბრა.

"ხელისუფლების ერთადერთი მიზანი დღეს არის, როგორმე მივიდეს არჩევნებამდე. როგორმე ლარი არ გაუფასურდეს ისე, რომ ამან ამომრჩეველზე მოახდინოს გავლენა. ყოველთვის, წინა საარჩევნო პერიოდში ხელისუფლება და მათ შორის, ეროვნული ბანკი ემსახურებოდა ხელისუფლების პოლიტიკურ მიზნებს და იჭერდა, როგორც იტყვიან, კბილებით ლარს, ახორციელებდა ინტერვენციებს. ამიტომ, შეიძლება ვთქვათ, რომ ლარი ასე ივლის იქით-აქეთ, ცოტა მაღლა, ცოტა დაბლა, სანამ არ ჩატარდება ადგილობრივი არჩევნები", — განაცხადა მან.

15 ივნისის ვაჭრობის შედეგად, ლარი როგორც დოლართან, ასევე ევროსთან მიმართებით გამყარდა და დადგენილი კურსის მიხედვით, ერთი დოლარის ღირებულება 3,1751 ლარი გახდა, რაც, აქამდე მოქმედ კურსთან შედარებით, 2,89 თეთრით გამყარებას ნიშნავს.

რაც შეეხება ევროს, ამ ვალუტასთან მიმართებით ლარი 3,37 თეთრით გამყარდა და ერთი ევრო 3,8492 ლარს გაუტოლდა.

აღსანიშნავია, რომ ერთი თვის ჭრილში ლარი დოლართან მიმართებით 24,4 თეთრით, ხოლო ევროსთან — 29 თეთრით არის გამყარებული.

შეგახსენებთ, რომ ლარის კურსის მერყეობის შესამცირებლად, საქართველოს ეროვნულმა ბანკმა მიმდინარე წელს 7 სავალუტო ინტერვენცია განახორციელა და ჯამურად 242,9 მლნ დოლარი გაყიდა. მათ შორის, ბოლო სავალუტო აუქციონი 22 აპრილს შედგა, სადაც ეროვნულმა ბანკმა 30 მილიონი დოლარი გაიყიდა.