ევროკავშირის ენერგეტიკული გაერთიანების დავების გადაწყვეტისა და მოლაპარაკებების ცენტრის დირექტორის მოადგილე დირკ ბუშლე ნამახვანჰესის პროექტთან დაკავშირებული მედიაციის პროცესთან დაკავშირებით აცხადებს, რომ ყველაზე მნიშნელოვანი და სასწრაფო საკითხი რიონის ხეობაში დაპირისპირების დეესკალაციაა. ევროკავშირის ენერგეტიკული გაერთიანების 15 ივნიის გამოქვეყნებული განცხადების თანახმად, მოლაპარაკებების მედიატორი ამბობს, რომ მშვიდობიანი პროტესტი და ხეობაში შესვლა შესაძლებელი უნდა იყოს, ჯებირის ორივე მხარეს მოსახლეობის უსაფრთოება კი — დაცული.

"ყველაზე მნიშნელოვანი და სასწრაფო საკითხი რიონის ხეობაში დაპირისპირების დეესკალაციაა. მშვიდობიანი პროტესტი და ხეობაში შესვლა შესაძლებელი უნდა იყოს, ჯებირის ორივე მხარეს მოსახლეობის უსაფრთოება კი, დაცული. შესაბამისი ზომების მიღება, პირველ რიგში, მთავრობის პასუხისმგებლობაა, რომელმაც აიღო ვალდებულება, შეცვალოს არსებული ბარიერები, უზრუნველყოს მთავარი მისასვლელი გზა და დაკავებულ აქციის მონაწილებზე ინფორმაციის მიწოდება", — ნათქვამია მის განცხადებაში.

მისივე თქმით, აქციის მონაწილეებმაც აიღეს ვალდებულება, რომ მშენებლობასთან მისასვლელ გზას არ დაბლოკავენ.

"ამ ვალდებულებების შესრულება მნიშვენლოვანია", — აცხადებს ევროკავშირის ენერგეტიკული გაერთიანების წარმომადგენელი.

ის, ასევე, აღნიშნავს, რომ მოქალაქეებსა და მთავრობას შორის ნდობის აღსადგენად, ასევე შეუქცევადი ზომებისგან თავის ასარიდებლად, ყველა ჩართულმა მხარემ აუცილებელი თავშეკავება უნდა გამოიჩინოს და ერთმანეთთან უნდა იურთიერთონ.

ნამახვანჰესის საკითხზე ევროკავშირის წარმომადგენლობით გამართული პირველი შეხვედრა 12 ივნისს გაიმართა. მხარები ამბობდნენ, რომ დიალოგი კონსტრუქციული იყო და ნაწილობრივ შეთახნმებას მიაღწიეს, დანარჩენ საკითხებზე კი საუბარი მომდევნო შეხვედრებზე გაგრძელდება.

როგორც ევროკავშირის წარმომადგენელმა განაცხადა, მხარეები სამ საკითხზე შეთანხმდნენ. ესენია:

  • პროექტის რისკების შეფასება;
  • რიონის ხეობაში სიტუაციის დეესკალაცია;
  • ენერგოუსაფრთხოების პოლიტიკის განსაზღვრა.

ნამახვანჰესის მშენებლობის მოწინააღმდეგე აქტივისტმა, ვარლამ გოლეთიანმა კი თქვა, რომ დაკმაყოფილდა მათი რამდენიმე მოთხოვნა: ბარიკადების აღება, პოლიციის გაყვანა, ნამახვანში პროტესტის გასაგრძელებლად დაბრუნება და დაკავებულების გათავისუფლება.

ეკონომიკის მინისტრის მოადგილის, დავით თვალაბეიშვილის თქმით, მნიშვნელოვანია, რომ იპოვეს შეხების წერტილები. რაც შეეხება, დაკავებულების გათავისუფლების საკითხს, მისი განცხადებით, ინფორმაციას პროკურატურას მიაწოდებენ.

რა თქვეს მხარებმა

ევროკავშირის ენერგეტიკული გაერთიანების დავების გადაწყვეტისა და მოლაპარაკებების ცენტრის თავმჯდომარის, დირკ ბუშლეს განცხადებით, შეხვედრაზე იყო წინააღმდეგობრივი აზრები და დიდი დისკუსიები, თუმცა შეთანხმება შეძლეს. მისი თქმით, მნიშვნელოვანია, რომ ერთ-ერთი პირობა, ენერგოპოლიტიკის განსაზღვრა მხოლოდ ფურცელზე დაწერილ ტექსტად არ დარჩეს და ხელისუფლებამ მის აღსრულებაზე იზრუნოს.

ვარლამ გოლეთიანის განცხადებით, შეთანხმდნენ, რომ თუ პარასკევამდე ხელისუფლება დაპირებებს შეასრულებს, მომდევნო პარასკევს ისევ შეხვდებიან და სამუშაო პროცესების შეჩერებას განიხილავენ. მისივე თქმით, ისაუბრეს იმაზეც, რომ შეწყდეს პოლიტიკურად მოტივირებული დაკავებები.

რაც შეეხება მოლაპარაკებებში ენკას ჩართულობის საკითხს, გარემოს დაცვისა და სოფლის მეურნეობის სამინისტროს წარმომადგენლის განცხადებით, ეს კომპანიამ თავად უნდა გადაწყვიტოს.

12 ივნისს ენკამ გაავრცელა განცხადება, რომ სოციალურ მედიაში ვრცელდება ინფორმაცია, თითქოს ტექნიკა დაასაწყობეს და მუშაობა შეაჩერეს, რაც არ შეესაბამება სიმართლეს.

"კომპანია არ აპირებს ქვეყნისთვის მნიშვნელოვანი პროექტის ნამახვანჰესის გაჩერებას, საინვესტიციო ვალდებულებებზე უარის თქმას და ქვეყნიდან გასვლას. ასევე, კომპანია მზადაა პროცესით დაინტერესებულ ყველა მხარეს მიაწოდოს საჭირო ინფორმაცია პროექტის შესახებ", — წერია მათ განცხადებაში.

მთავრობამ ნამახვანჰესთან დაკავშირებულ დისკუსიებში ევროკავშირის ენერგეტიკული გაერთიანების წარმომადგენლის ჩართვის შესახებ გადაწყვეტილება 24 აპრილს გაასაჯაროვა.