Tbilisi Pride-ის ხელმძღვანელი გიორგი თაბაგარი ხელისუფლებას მოუწოდებს, რომ ძალადობრივი, ჰომოფობიური და პრორუსული ჯგუფების ლიდერის, ლევან ვასაძის განცხადებებზე შესაბამისი რეაგირება ჰქონდეს. მისი თქმით, სახელმწიფოს უმოქმედობის შედეგია, რომ ვასაძე დღესაც ძალადობრივ განცხადებებს ავრცელებს.

"ეს კაცი ღიად ძალადობდა 2019 წელს და მაშინ სახელმწიფომ არაფერი გააკეთა მის შესაჩერებლად. პროკურატურას საქმე დღემდე თაროზე აქვს შემოდებული. ზუსტად ამ უმოქმედობის შედეგია ის, რომ აგერ 2021 წელსაც იგივეს აგრძელებს. ღიად ლობირებს რუსული კანონების მიღებას საქართველოში, ემუქრება კონკრეტულ ადამიანებს და სახელმწიფოს!

ეს კაცი არის საფრთხე ქვეყნის უსაფრთხოებისთვის და ამაზე სახელმწიფოს უნდა ჰქონდეს შესაბამისი რეაგირება", — აცხადებს თაბაგარი.

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადას აძლევს.

"დღეს ხომ არის 15 ივნისი, ვადას ვაძლევთ 25 ივნისამდე, ათდღიან ჩვენს ხელისუფლებას გააუქმონ პრაიდი, რათა არ მისცენ საბაბი ქვეყანაში ესკალაციისა და დაპირისპირების პროცესების განვითარებას და ჩვენი ქვეყნის დისკრედიტაციას ჩვენს უშუალო სამეზობლოში", — აცხადებს ვასაძე.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

ღირსების მარში თბილისში პირველად 2019 წლის ივლისში ჩატარდა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.

Tbilisi Pride-მა პრაიდის კვირეულის ფარგლებში 5 ივლისს თბილისის ცენტრში ღირსების მარშს გამართავს.