ქართული ოცნების თავმჯდომარე, ირაკლი კობახიძე ამბობს, რომ 20 ივნისის აქციის დაშლის სპეცოპერაცია "გაუგებრად" იყო დაგეგმილი. მთავარი არხის ეთერში მან იმაზეც ისაუბრა, რომ გარკვეული ქმედებები ამყარებდა იმ ეჭვს, რომ ყოფილი პრემიერმინისტრი გავლენის ქვეშ მოქცეული უფრო ადრე იყო.

როგორც ის ამბობს, ოპერაციას ორი პირი გეგმავდა — შს მინისტრი გიორგი გახარია და მისი მოადგილე, კახა საბანაძე.

"მაგალითად, რაც ხდებოდა 20 ივნისს, ჩვენ გაგვიჩნდა კითხვის ნიშნები. ოპერაცია რაც იყო გახარიას მხრიდან, იყო გაუგებრად დაგეგმილი, რამაც მძიმე შედეგებამდე მიგვიყვანა", — აღნიშნა კობახიძემ.

მისივე თქმით, გაჩნდა ორი კითხვა, 20 ივნისის ღამეს რატომ იდგნენ შსს-ს სპეცრაზმელები პარლამენტის ჭიშკრის გარეთ და არა შიგნით, ამასთან, რატომ არ გამოიყენეს წყლის ჭავლი და სხვა უფრო "რბილი" საშუალებები.

"საბოლოოდ ჯამში იძულება იყო ტყვიების გამოყენება, რომ მოგერიებულიყო შტურმი პარლამენტზე", — განაცხადა კობახიძემ.

კობახიძე აცხადებს, რომ 20 ივნისის ღამეს ბაქოში ყოფნის დროს მან დაურეკა გიორგი გახარიას და ჰკითხა რა ვითარება იყო, რაზეც პასუხი მიიღო, რომ აქციის მონაწილეები პარლამენტში აუცილებლად შევიდოდნენ:

"ეს მე გამიკვირდა, რადგან გაუგებარი იყო მისი ეს პოზიცია. ეს იყო შეცდომა თუ შეგნებული შეცდომები, მე დამატებით ვეღარ ვიმსჯელებ".

2019 წლის ივნისში, სერგეი გავრილოვის ვიზიტის შემდეგ, ირაკლი კობახიძე პარლამენტის თავმჯდომარის თანამდებობიდან გადადგა. ამ დროს ის აცხადებდა, რომ ის და მისი გუნდი გახარიას გადადგომას არ ემხრობოდა და მას 20 ივნისის ღამისთვის "საქმის კაცს" უწოდებდა.