ქართული ოცნების თავმჯდომარის, ირაკლი კობახიძის განცხადებით, 20 ივნისის შემდეგ გუნდში იყო მოსაზრება, რომ გიორგი გახარია შინაგან საქმეთა მინისტრის პოსტიდან უნდა გადამდგარიყო, თუმცა შემდგომში ეს პოზიცია შეიცვალა. ამის შესახებ მან მთავარი არხის ეთერში ისაუბრა.

"20 ივნისის შემდეგ უახლოეს პერიოდში, არაერთი ლიდერი საუბრობდა და იყო ასეთი მოსაზრება, რომ უმჯობესი იყო გიორგი გახარიას დაეტოვებინა შინაგან საქმეთა მინისტრის თანამდებობა. და ეს საკითხი მომწიფებულიც იყო რაღაც მომენტში, თუმცა რაღაცამ შეცვალა ეს გადაწყვეტილება და ჩვენ დავეთანხმეთ. რაღაცამ შეცვალა არა ვიღაცამ", — აღნიშნა კობახიძემ.

მისივე თქმით, ეს "რაღაც" გახარიასთან დაკავშირებული გარე ფაქტორი იყო და რაღაცა მომენტში, ალბათ, ამაზეც ისაუბრებს.

2019 წლის ივნისში, სერგეი გავრილოვის ვიზიტის შემდეგ, ირაკლი კობახიძე პარლამენტის თავმჯდომარის თანამდებობიდან გადადგა. ამ დროს ის აცხადებდა, რომ ის და მისი გუნდი გახარიას გადადგომას არ ემხრობოდა და მას 20 ივნისის ღამისთვის "საქმის კაცს" უწოდებდა.