საქართველოში აშშ-ს ელჩი კელი დეგნანი, ოკუპირებულ ცხინვალში უკანონო პატიმრობაში მყოფ ზაზა გახელაძის ოჯახს შეხვდა. გახელაძის უკანონო დაკავებასა და პატიმრობაში მან რუსეთის როლს გაუსვა ხაზი.

"მოხარული ვარ, რომ მქონდა შესაძლებლობა ზაზას ოჯახთან მესაუბრა. ეს არის გულგასატეხი და ამავე დროს განმარისხებელი მაგალითი იმისა, თუ რა თამაშს თამაშობს რუსეთი საქართველოში და ამას აქვს თავისი შედეგები რიგითი ადამიანების ცხოვრებაში. კიდევ ერთხელ მინდა დავაფიქსირო ამერიკის შეერთებული შტატების ურყევი ერთგულება საქართველოს ტერიტორიული მთლიანობისა და სუვერენიტეტისადმი. რუსეთმა უნდა გაიყვანოს ჯარი საქართველოდან, უნდა შეასრულოს 2008 წლის შეთანხმება, უკან წაიღოს ამ რეგიონების აღიარება, იმიტომ რომ სასწორზე ადამიანების სიცოცხლეა", — განაცხადა დეგნანმა.

საოკუპაციო რეჟიმის მიერ უკანონოდ დაკავებული ზაზა გახელაძის დედა, ნანა ბუნტური აცხადებს, თუ გახელაძეს თავის დაბადების დღემდე, 23 ივნისამდე არ გაათავისუფლებენ, ოჯახი აქციებს გამართავს.

"პირადად ღარიბაშვილი დაგვპირდა თვის ბოლომდე გამოუშვებდნენ ჩემს შვილს, მაგრამ არც მაგან გაამართლა და მაგანაც მოგვატყუა ისევ. 23-ში ჩემს შვილს დაბადების დღე აქვს. ჩვენ ესაც ვუთხარით ღარიბაშვილს, რომ თვის ბოლო თუ არა 23-ში დაბადების დღე აქვს, 33 წლის გაიტაცეს და 34 წლის დაბადების დღეს იქ ნუ შეახვედრებთ-მეთქი ჩემს შვილს. თუ არც ამ თხოვნამ არ გაჭრა, 23-ში სახლში მართლა არ გავჩერდებით, დავგეგმავთ აქცია იქნება, თუ სხვა, სახლში ნამდვილად აღარ გავჩერდებით და ფეხით ჩავალ ცხინვალის ციხეში", — განაცხადა მან.

ზაზა გახელაძე 2020 წლის 11 ივლისს, კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: