ეუთოს გენერალური მდივანის ჰელგა მარია შმიდი საოკუპაციო ხაზის მახლობლად მდებარე სოფელ ერგნეთს ეწვია. მან, ასევე, საოკუპაციო ხაზის მახლობლად მდებარე სოფელ ციცაგიანთკარში წყლის მომარაგების პროექტის ინაუგურაციის ღონისძიებაში მიიღო მონაწილეობა.

"ჩვენთვის ძალიან მნიშვნელოვანია, ადგილობრივ მოსახლეობას შევუქმნათ სტაბილურობა და ამისათვის მნიშვნელოვანია მსგავსი პროექტები, რომლის პრეზენტაცია დღეს გაიმართა", — განაცხადა ეუთოს გენერალურმა მდივანმა.

პროექტის გახსნის ცერემონიალს იტალიის ელჩი საქართველოში, ენრიკო ვალვოც დაესწრო.

შმიდის საქართველოში ვიზიტის ფარგლებში გამყოფი ხაზის სოფელ ციცაგიაანთკარს სტუმრობდა, ასევე, საქართველოში აშშ-ს ელჩი კელი დეგნანი, რომელიც ოკუპირებულ ცხინვალში უკანონო პატიმრობაში მყოფ ზაზა გახელაძის ოჯახს შეხვდა.

უცხოელ დიპლომატებს თან ახლდა შერიგებისა და სამოქალაქო თანასწორობის საკითხებში სახელმწიფო მინისტრი, თეა ახვლედიანი.

სახელმწიფო მინისტრმა საერთაშორისო პარტნიორებს თანადგომისთვის მადლობა გადაუხადა და აღნიშნა, რომ ეს მხარდაჭერა კიდევ ერთხელ ადასტურებს ოკუპაციის თანმდევი შედეგებისა და კონფლიქტის შედეგად დაზარალებული მოსახლეობის წინაშე არსებული გამოწვევების აქტუალობას საერთაშორისო დღის წესრიგში.

ციცაგიაანთკარში ახალი წყლის სისტემა მოეწყო, რომელიც 144 ოჯახს სუფთა სასმელი წყლით უზრუნველყოფს. სოფელს წყალი 2008 წლის ომის შემდეგ არ ჰქონდა, მას შემდეგ რაც წყლის გამანაწილებელი სათავე ოკუპირებულ ტერიტორიაზე აღმოჩნდა.

პროექტი გორის მუნიციპალიტეტმა, ევროპისევროპის უსაფრთხოებისა და თანამშრომლობის ორგანიზაციისა (ეუთო) და USAID-ის პროექტ "ზრდა"-ს მხარდაჭერით განახორციელა.

14 ივნისს საქართველოს ევროპის უსაფრთხოებისა და თანამშრომლობის ორგანიზაციის გენერალური მდივანი, ჰელგა მარია შმიდი ეწვია.

ორდღიანი ვიზიტის ფარგლებში ეუთო-ს გენერალური მდივანი შეხვედრებს პრეზიდენტთან, სალომე ზურაბიშვილთან, პრემიერმინისტრთან, ირაკლი ღარიბაშვილთან, პარლამენტის თავმჯდომარესთან, კახა კუჭავასთან, ვიცე-პრემიერთან, დავით ზალკალიანთან და შერიგებისა და სამოქალაქო თანასწორობის საკითხებში საქართველოს სახელმწიფო მინისტრთან, თეა ახვლედიანთან გამართავს.