77 მომხრე, 23 წინააღმდეგი — საქართველოს პარლამენტმა მეორე მოსმენით მხარი დაუჭირა 20 ივნისის ამნისტიის შესახებ კანონპროექტს, რომელიც ქართულმა ოცნებამ დააინიცირა.

ამნისტია 19 აპრილის შარლ მიშელის დოკუმენტის ფარგლბეში შემუშავდა, რომელსაც ქართულმა ოცნებამ და ოპოზიციის ნაწილმა ხელი მოაწერა. მმართველი გუნდის მიერ შემუშავებული პროექტის საბოლოოდ მიღების შემთხვევაში, ამნისტია შეეხება ყველა იმ პირს, რომელიც 20 ივნისის საქმეზე ბრალდებული ან მსჯავრდებულია, მათ შორის სამართალდამცავებს.

მომზადებული კანონპროექტის თანახმად, სისხლისსამართლებრივი პასუხისმგებლობისა და სასჯელისაგან გათავისუფლდეს ყველა პირი, რომელმაც 2019 წლის 19-21 ივნისის მოვლენებთან დაკავშირებით ჩაიდინა დანაშაული და ამ კანონით დადგენილი წესით უარს არ აცხადებს მის მიმართ ამნისტიის გავრცელებაზე. ამავე მუხლის მიხედვით, ამნისტია ვრცელდება დანაშაულის მომზადების ან მომზადების მცდელობაზეც და პირობით მსჯავრზეც.

ამნისტია არ გავრცელდება სისხლის სამართლის კოდექსის 117-ე, 144¹-144³ მუხლებით გათვალისწინებულ დანაშაულებზე, რაც ჯანმრთელობის განზრახ მძიმე დაზიანებას, წამებასა და დამამცირებელ ან არაადამიანურ მოპყრობას გულისხმობს.

კანონპროექტი მეორე მოსმენით ჯერ კიდევ გუშინ, 8 ივნისს უნდა განეხილათ, თუმცა ქართული ოცნების ინიციატივით, მოსმენა გადაიდო იმ მიზეზით, რომ სხდომას ნაციონალური მოძრაობის წევრები არ იმყოფებოდნენ. ნაციონალური მოძრაობის წარმომადგენლები საკანონმდებლო ორგანოში დღის მეორე ნახევარში მივიდნენ, თუმცა საკითხი არ განხილულა.

ნაციონალური მოძრაობა ამნისტიის შესახებ კანონპროექტს არ იზიარებს, რადგან ის სამართალდამცავების ამნისტირებასაც მოიაზრებს. ოპოზიციის ნაწილი, რომელმაც მიშელის დოკუმენტს ხელი მოაწერა აცხადებს, რომ კანონპროექტი შეთანხმების სულისკვეთებას არ გამოხატავს.

კრიტიკის საპასუხოდ ქართულ ოცნებაში აცხადებენ, რომ იმ საქმეებიდან, რომელთან ამნისტია შეეხებათ, ნიკა მელიასი ყველაზე მძიმეა. ამასთან, აღნიშნავენ, რომ აქციის დაშლისას დაზარალდნენ როგორც მოქალაქეები, ისე სამართალდამცავები.

ოპოზიციის ნაწილმა ამნისტიის საკუთარი კანონპროექტი დაარეგისტრირა, რომელსაც მმართველ პარტიაში მხარი არ დაუჭირეს.

ქართული ოცნების ვერსიის მიხედვით, ამნისტია გავრცელდება 20 ივნისთან დაკავშირებულ ყველა საქმეზე, გარდა ზემოთ ჩამოთვლილი სამი მუხლისა, ხოლო ოპოზიციის კანონპროექტში დაკონკრეტებულია ის მუხლები, რომლებზეც უნდა გავრცელდეს ამნისტია, დანარჩენი ყველა საქმე კი პროექტს მიღმა რჩება (ანუ ამნისტია არ შეეხება), მათ შორის, 20 ივნისის საქმეზე სამომავლოდ შესაძლო დაწყებული გამოძიებები.

კანონპროექტებს შორის კიდევ ერთი განსხვავება ეხება დაზარალებულის თანხმობას. ოპოზიციის პროექტის მიხედვით, იმისთვის, რომ კონკრეტულ სახელმწიფო მოხელეს არასათანადო ქმედებისთვის ამნისტია შეეხოს, ამაზე ამ ქმედებით დაზარალებული ადამიანი უნდა იყოს თანახმა. ქართულ ოცნებაში მიიჩნევენ, რომ დაზარალებულის თანხმობა საჭიროება მხოლოდ სამართალდამცავების წინააღდეგ არსებულ საქმეებში პოლიციელების დისკრიმინაციაა.