2017 წელს გამოსული პოპულარული ფილმის, Call Me By Your Name-ის გაგრძელება, რომელიც დიდი ხანია, იგეგმებოდა, შეჩერდა.

Bones & All-ის გადასაღებ მოედანზე, რომელიც ლუკა გუადანინოს ახალი პროექტია ტიმოთი შალამეს მონაწილეობით, რეჟისორის ინტერვიუ შედგა ვებგამოცემა Deadline-თან. ინტერვიუს ერთ-ერთი შეკითხვა სწორედ იმას შეეხებოდა, თუ რა ეტაპზეა Call Me By Your Name-ის გაგრძელება. გასულ წელს გავრცელებული ინფორმაციით, მასში მონაწილეობა უნდა მიეღოთ შალამესაც და არმი ჰამერსაც, ამასთან, მეორე ნაწილის სცენარისტი ჯეიმს აივორი აღარ იქნებოდა.

"სიმართლე გითხრათ, ჩემი გული ისევ იქ არის, თუმცა ახლა ამ ახალ ფილმზე ვმუშაობ", — განაცხადა გუადანინომ, — "მალე კი ალბათ Scarface-ის პროექტზე მუშაობასაც დავიწყებ, ასე რომ, საქმე ბევრი მაქვს. ოკეანის აქეთ მხარესა და იმ ფილმებზე ვკონცენტრირდები, რომელთა გადაღებაც მინდა".

ამ ყველაფერს თან ერთვის ისიც, რომ არმი ჰამერის კანიბალიზმსა და სექსუალურ ძალადობაში დადანაშაულების შემდეგ მსახიობის მონაწილეობით რამდენიმე პროექტი გაუქმდა, მათ შორის, ფილმი, სადაც ჰამერს ჯენიფერ ლოპესთან ერთად უნდა მიეღო მონაწილეობა. მსახიობთან თანამშრომლობა გაწყვიტა მისმა აგენტმაც და რადგან Call Me By Your Name-ის გაგრძელებაში მთავარი როლების შემსრულებელი მსახიობების შეცვლა ნაკლებსავარაუდოა, ონლაინგამოცემების ვარაუდით, პროექტი კი არ გაჩერდა, საერთოდ გაუქმდა.

აღსანიშნავია ისიც, რომ სხვა პროექტებზე გადაერთო ტიმოთი შალამეც. გარდა გუადანინოს პროექტში მონაწილეობისა, ის მალე ვილი ვონკას როლსაც მოირგებს Warner Bros.-ის ახალ ფილმში.