მსახიობი გიორგი გიორგანაშვილი, იგივე ბახალა განსაკუთრებით დიდი ოდენობის ნარკოტიკული საშუალების შემოტანის ორგანიზებაში უდანაშაულოდ თბილისის სააპელაციო სასამართლომაც ცნო. მსჯავრდებულის ადვოკატმა On.ge-ს უთხრა, რომ მის დაცვის ქვეშ მყოფს ახლა დიდი ოდენობით ნარკოტიკული საშუალების შეძენა-შენახვას ედავებიან. დაცვის მხარე აღნიშნულ ბრალდებას უსაფუძვლოს უწოდებს და მის გასაჩივრებასაც აპირებს. ბრალს არ აღიარებს მსახიობიც.

გიორგი გიორგანაშვილს გამოძიება ქვეყანაში დიდი რაოდენობით ნარკოტიკული საშუალებების შემოტანის ორგანიზებაში მონაწილეობას ედავებოდა. გამოძიების ვერსიით, 2017 წლის იანვარში ირაკლი ქორიძე თავის ნაცნობებს შეუთანხმდა — გიორგი გიორგანაშვილსა და ჯაბა ხულორდავას, რომ მათ უცხოეთიდან საქართველოში უკანონოდ შემოეტანათ განსაკუთრებით დიდი ოდენობით ნარკოტიკული საშუალება.

ამ დროისთვის, ჯაბა ხულორდავა მსჯავრდებულია და სასჯელის სახით განსაზღვრული აქვს 7 წლით თავისუფლების აღკვეთა. დანაშაულის ორგანიზებაში ბრალდებულ წარსულში მსჯავრდებულ ირაკლი ქორიძეს პატიმრობა უკვე შეეფარდა.

გიორგანაშვილს 23 იანვარს თბილისის საქალაქო სასამართლომ მას სხვა საქმეზე, 0,3726 გრამი ბუპრენორფინის ფლობისთვის 8-წლიანი პატიმრობა მიუსაჯა.