მართალია, ყველა ცხოველი კარგია და ჩვენს სიყვარულს უპირობოდ იმსახურებს, თუმცა თბილისის ზოოპარკმა გადაწყვიტა, ბინადრები წაეხალისებინა და საუკეთესო ყოფაქცევის მქონე ცხოველებისთვის ყოველთვიურად ზოოპარკის კარგი ცხოველის სტატუსი მიენიჭებინა. შესაბამისად, ამიერიდან მუდმივად გავეცნობით იმ ცხოველებს, რომლებიც თვის განმავლობაში სანიმუშოდ იქცეოდნენ.

მაისის საუკეთესო ცხოველი დათუნია ბარნი გახდა, რომელმაც უდიდესი გულისხმიერება გამოიჩინა და გორიდან გადმოყვანილ დათვს, ბოთეს სოციალიზაციასა და ადაპტაციაში დაეხმარა. ახალ გარემოში ერთგული მეგობრის შეძენა უმნიშვნელოვანესია, ამიტომ დათუნია ბარნი ნამდვილად იმსახურებდა საუკეთესო ცხოველის სტატუსს.

ფოტო: თბილისის ზოოპარკი

თბილისის ზოოპარკმა თვის ყველაზე ცუდი და მოუსვენარი ცხოველიც გამოავლინა. ამ ნომინაციაში გამარჯვებული დათვი მაშა გახდა, რომელსაც ცნობისმოყვარეობამ სძლია და კამერების ყუთი დააზიანა. ამის გამო ზოოპარკში რამდენიმე დღით კამერები გაითიშა.

იმედი გვაქვს, მაშა მალე დაჭკვიანდება და დათუნია ბარნის მხარდამხარ იბრძოლებს კარგი ცხოველის სტატუსის მოსაპოვებლად.

თვის ხუმარა ჟურნალისტად კი შეგიძლიათ ამ სტატიის ავტორი დაასახელოთ, რომელმაც ირმების ფოტოთი ცელქ დათუნიებზე სტატია შემოგაპარათ.

ამავე თემაზე: