"რატომ შემოდიან? ფული აიღეს ბიძინა ივანიშვილისგან?", — ასე ეხმაურება პარტია მოქალაქეების ლიდერი, ალეკო ელისაშვილი ერთიანი ნაციონალური მოძრაობის პარლამენტში შესვლის გადაწყვეტილებას.

მისივე თქმით, ენმ-ის ლიდერები მათ გამოიყვანეს ციხიდან და საარჩევნო რეფორმასაც ისინი ახორციელებენ.

"საერთოდ რატომ შემოდიან ან რის ფასად შემოდიან ნაციონალური მოძრაობის წევრები პარლამენტში? რატომ შემოდიან? ფული აიღეს ბიძინა ივანიშვილისგან? მაგათი ლიდერები ციხიდან ჩვენ გამოვიყვანეთ, საარჩევნო რეფორმას ჩვენ ვახორციელებთ, მართლმსაჯულების რეფორმას ჩვენ ვახორციელებთ, რატომ შემოდიან, თანამდებობები ეხარბებათ? ან ჩვენ რატომ გვლანძღავდნენ ერთი გამაგებინონ, ხომ არიან ღირსები, რომ ყოველდღე დერეფნები მოვუწყოთ აქ და ის ვეძახოთ, რასაც ჩვენ გვეძახდნენ და უარესი. დაეტიონ იმ ქუჩაში, რა ნამუსით შემოდიან, რა სინდისით შემოდიან, თვალებში ჩვენ როგორ უნდა ჩაგვხედონ?", — აცხადებს ელისაშვილი.

გუშინ, 30 მაისს, პოლიტსაბჭოს სხდომის შემდეგ ცნობილი გახდა, რომ ერთიანი ნაციონალური მოძრაობა პარლამენტში შედის. მიუხედავად ამისა, პარტია შარლ მიშელის დოკუმენტს ხელს არ მოაწერს.