ვაქცინის მეორე დოზით ასაცრელად შპს კლინიკა რუსთავში მისულ ადამიანებს ვაქცინა არ დახვდათ. მათ რამდენიმე საათი დასჭირდათ იმისთვის, რომ კუთვნილი ვაქცინა მიეღოთ, რომელზეც წინასწარ იყვნენ დარეგისტრირებულნი.

On.ge-ს ინფორმაციით, კლინიკა რუსთავში აღნიშნული პრობლემა 10-მდე ადამიანს შეექმნა.

"21-ე დღეა დღეს. პირველად ზუგდიდში ავიცერი. დღეს მოვედი და უბრალოდ ვაქცინა არ არის. ვერც ვერავინ გვცემს პასუხს. ცხელ ხაზზე ვრეკავთ კლინიკაში გვამისამართებენ, კლინიკა — ცხელ ხაზზე. აგრეთვე, უნდა ითქვას, რომ საავადმყოფოს დირექტორი არის ძალიან აგრესიული", — გვითხრა ცირა ჯგერენაიამ.

ვაქცინის გარეშე დარჩა დავით ჯიქიაც, რომელიც მეორე დოზაზე ოთხი დღის წინ დარეგისტრირდა.

"რომ ვიკითხეთ, გვითხრეს, ვაქცინა არ აქვთ. შესვენების ხარჯზე გამოვედი სამსახურიდან, რომ არ გამეცდინა სამსახური. დიდი აგრესიულობით გამოირჩეოდა კლინიკის დირექტორი. გავიკეთეთ პირველი დოზა და გაგვიკეთონ მეორე დოზაც", — ამბობს დავით ჯიქია.

დაავადებათა კონტროლის ეროვნული ცენტრის ხელმძღვანელის (NCDC), ამირან გამყრელიძის ინფორმაციით, ლოჯისტიკურ პრობლემას ჰქონდა ადგილი, რაც უკვე გამოსწორდა.

"ხაზს ვუსვამ, რომ ვინც ჩაწერილია და აქვს ე.წ. Booking გაკეთებული ვაქცინაზე, ყველა მათგანისთვის ვაქცინა არსებობს. ანუ, ვაქცინის დეფიციტი არ არის. მაქვს ინფორმაცია, რომ რაღაც ლოჯისტიკური პრობლემა იყო, ის დღეს უკვე გამოსწორდა. ამიტომ, მშვიდად იყვნენ ის ადამიანები. ბოდიშს ვუხდი მათ, რომ ასეთ გაუგებრობას ჰქონდა ადგილი", — განაცხადა გამყრელიძემ.

თემასთან დაკავშირებით On.ge თავიდან ჯანდაცვის სამინისტროს დაუკავშირდა, საიდანაც დაავადებათა კონტროლის ეროვნულ ცენტრში გადაგვამისამართეს. NCDC-ის პრესსამსახურში კი გვითხრეს, რომ ეს კითხვა 14:00 საათზე დაგეგმილ ვებინარზე დაგვესვა, მაშინ, როცა რუსთავის კლინიკაში მოქალაქეებს პრობლემა დილის 10:00 საათიდან ჰქონდათ.