ამერიკის პრეზიდენტმა დონალდ ტრამპმა Breitbart News-სთვის მიცემულ ექსკლუზიურ ინტერვიუში თქვა, რომ ოსკარის შეცდომა, წლის საუკეთესო ფილმის შეცდომით გამოცხადებაზე, არ მოხდებოდა, მას რომ თავს არ დასხმოდნენ და მეტი ყურადღება მიექციათ ღონისძიების დეტალებისთვის.

"მე ვფიქრობ, რომ ისინი იმდენად ძლიერად იყვნენ ფოკუსირებულნი პოლიტიკაზე, რომ დასასრული არაორგანიზებული და წარუმატებელი აღმოჩნდა. ამან ნამდვილად დამასევდიანა. ამით ოსკარმა თავისი გლამური დაკარგა. საერთოდ აღარ იყო საღამო გლამურული. მე ვყოფილვარ ოსკარზე. 2017 წლის ოსკარს კი რაღაც განსაკუთრებულობა აკლდა და მისი დასასრული ძალიან სამწუხარო იყო".

ოსკარის ცერემონიაზე, საუკეთესო ფილმის ნომინაციის გამოცხადების დროს, წარმდგენებს უორენ ბიტისა და ფეი დანაუეის კონვერტი შეეშალათ და წლის ფილმად La La Land დაასახელეს, სინამდვილეში კი ამ ნომინაციაში Moonlight-მა გაიმარჯვა.

კინოაკადემიის დაჯილდოების ცერემონია უარყოფითად შეაფასა თეთრი სახლის სოციალური მედიის დირექტორმა დან სკავინომაც და ტვიტერზე დაწერა, რომ მისი რეიტინგი დაცემულია.

ოსკარის 89-ე ცერემონიაზე, წამყვანმა ჯიმი კიმელმა, ტრამპზე რამდენჯერმე იხუმრა:

"მინდა რომ ტრამპს მადლობა გადავუხადო. გახსოვთ შარშან კინოაკადემიას რომ რაციზმში ადანაშაულებდნენ? ეს ასე აღარაა და მადლობა მას".

მან ასევე ჟურნალისტების დარბაზიდან გაძევება გაითამაშა.

კიმელმა ტრამპს ტვიტერიდან ორჯერ მიმართა, ერთხელ კითხვით - უყურებდა თუ არა შოუს.

ხოლო მეორედ - მერილ სტრიპისგან მოკითხვა გაუგზავნა. შეგახსენებთ, რომ ტრამპმა ოქროს გლობუსზე სტრიპის სიტყვით გამოსვლის შემდეგ თქვა, რომ ის ამხელა დაფასებას არ იმსახურებს.