ვიეტნამის ჯანდაცვის მინისტრი, ნგუენ თან ლონგი აცხადებს, რომ ქვეყანაში კორონავირუსის ახალი შტამი აღმოაჩინეს, რომელიც ინდური და ბრიტანული შტამების ნაზავია და ჰაერით სწრაფად ვრცელდება. ინფორმაცია VnExpress-ის გამოცემაზე დაყრდნობით Reuters ავრცელებს.

როგორც Reuters აღნიშნავს, გასულ წელს კორონავირუსის წარმატებული შეკავების შემდეგ, ახლა ვიეტნამში ეპიდაფეთქებას ებრძვიან, რომელიც უფრო სწრაფად ვრცელდება. აპრილის შემდეგ დაახლოებით 3 600 ადამიანი დაინფიცირდა, რაც ქვეყანაში ჯამური შემთხვევების ნახევარს წარმოადგენს.

"ახალი პაციენტების გენეტიკური სექვენირების შემდეგ, აღმოვაჩინეთ ახალი ვარიანტი, რაც ინდური და ბრიტანული შტამების ნაზავია. კერძოდ, ეს არის ინდური ვარიანტი მუტაცია, რომელიც თავდაპირველად ბრიტანული ვარიანტის მიეკუთვნებოდა", — განაცხადა ჯანდაცვის მინისტრმა.

ვიეტნამში აქამდე ვირუსის შვიდი ვარიანტის არსებობის შესახებ განაცხადეს. ლონგის განცხადებით, ვირუსი უფრო ადვილად გადამდებია, რის გამოც მოკლე პერიოდში სხვადასხვა ადგილას ბევრი შემთხვევა დაფიქსირდა.

ამ ეტაპისთვის ქვეყანაში კორონავირუსის 6 396 შემთხვევაა დადასტურებული, 47 ადამიანი კი გარდაიცვალა.