ერთ-ერთი ყველაზე ცნობილი გერმანულენოვანი მწერლის, ფრანც კაფკას ხელნაწერების, პირადი წერილებისა და ჩანახატების ხილვა მკითხველებს ამიერიდან ონლაინ ისრაელის ეროვნული ბიბლიოთეკის ვებგვერდზე შეუძლიათ. კოლექცია კაფკას ერთ-ერთი მოთხრობის სამ ვერსიას, ჩანახატებს, ასობით პირად წერილს, სამოგზაურო დღიურსა და სხვა მასალებს აერთიანებს.

ფოტო: MAX BROD ESTATE / NATIONAL LIBRARY OF ISRAEL

კოლექცია ისრაელის ეროვნულ ბიბლიოთეკას კაფკას მეგობარმა, მაქს ბროდმა დაუტოვა. კაფკას თხოვნით, ბროდს ყველაფერი უნდა დაეწვა, თუმცა ბროდი ასე არ მოიქცა. ბროდის წყალობით, ფრანც კაფკა მსოფლიომ გაიცნო და დღეს იგი მე-20 საუკუნის ერთ-ერთ უმნიშვნელოვანეს მწერლადაც ითვლება.

ფოტო: MAX BROD ESTATE / NATIONAL LIBRARY OF ISRAEL

1968 წელს, მაქს ბროდის გარდაცვალების შემდეგ, კოლექცია დაიკარგა. ეროვნული ბიბლიოთეკა კოლექციას წლების განმავლობაში ეძებდა გერმანიაში, შვეიცარიასა და ისრაელში. კოლექცია საბოლოო სახით ბიბლიოთეკამ 2019 წელს მიიღო.

"წლების განმავლობაში აღნიშნული დოკუმენტები საზოგადოებისთვის ხელმისაწვდომი არ იყო, თუმცა ამიერიდან ჩვენ მკვლევრებსა და კაფკას მილიონობით გულშემატკივარს ისრაელსა და მსოფლიოში მათზე უფასო წვდომას ვთავაზობთ", — განაცხადა ეროვნული ბიბლიოთეკის დირექტორმა.