ხელოვნების სფეროში მოღვაწე ადამიანებისთვის საკუთარი ნამუშევრების ფართო საზოგადოებისთვის გაზიარებისა და რეალიზების შესაძლებლობა აუცილებელია. სწორედ ამ მიზანს ემსახურება ხელოვან ქალთა ციფრული გამოფენის კვირეული, რომელიც 27 მაისიდან 2 ივნისის ჩათვლით გაიმართება.

კვირეულის მიზანი ხელოვან ქალთა ნამუშევრებზე ხელმისაწვდომობის უზრუნველყოფა და მათი ეკონომიკური გაძლიერების ხელშეწყობაა. პროექტის ფარგლებში, იქმნება ხელოვან ქალთა მონაცემთა ბაზა და საერთაშორისო პროფესიული ქსელი, რომლის დახმარებით პროფესიონალი და მოყვარული მხატვარი ქალები ხელოვნების საერთაშორისო სივრცეში ინტეგრაციას, კოლეგებთან ინტერნეტით კომუნიკაციასა და კარიერის მართვას შეძლებენ.

გამოფენაში 200-ზე მეტი მოქმედი ქართველი და უცხოელი ხელოვანი ქალი იღებს მონაწილეობას. ხელოვან ქალებს საკუთარი ნამუშევრების ფართო საზოგადოებისთვის გაცნობის გარდა, მათი გაყიდვაც შეეძლებათ. ხელოვანთან მყიდველს გამოფენის საკოორდინაციო ჯგუფი საკომისიო მომსახურების გარეშე დააკავშირებს.

კვირეულის ფარგლებში, ხელოვნების მოყვარულებს სხვადასხვა ციფრული ღონისძიება ელით. გამოფენა საზოგადოებრივი არხის ვებგვერდზე გაშუქდება. კვირეულზე დასწრება და მონაწილეობა თავისუფალია. ამისათვის შეგიძლიათ ეწვიოთ პროექტის ვებგვერდს ან ღონისძიების ბმულს.

ხელოვან ქალთა პირველი ფართომასშტაბიანი ციფრული გამოფენის კვირეული თბილისის მერიის მხარდაჭერითა და მეწარმე ქალთა საბჭო საქართველოშისა და ფონდ არტკავკასუსის ორგანიზებით იმართება. პროექტი ევროკავშირის პროგრამის წარმომადგენლობა საქართველოში — შემოქმედებითი ევროპის, საქართველოში ნიდერლანდების სამეფოს საელჩოსა და საზოგადოებრივი მაუწყებლის მხარდაჭერით ხორციელდება.