მიმდინარე წლის იანვარ-მარტში საქართველოდან უცხოეთში 57 849 ვიზიტი განხორცილედა, რაც 2020 წლის იმავე პერიოდთან შედარებით 87,2%-ით ნაკლებია. კლება, ბუნებრივია, პანდემიით გამოწვეულ შეზღუდვებს უკავშირდება.

რაც შეეხება 2020 წლის მონაცემებს, ამ პერიოდში, 2019 წელთან შედარებით, საქართველოდან უცხოეთში განხორციელებული ვიზიტები 74,1%-ით, 615 679-მდე შემცირდა.

საზღვრის კვეთის მონაცემების მიხედვით, ვიზიტორთა 81,5% კაცი, ხოლო 18,5% ქალი იყო. ასაკობრივი კატეგორიის მიხედვით კი, ვიზიტორთა რაოდენობა ასე გადანაწილდა:

  • 15-30 წლის — 22,4%;
  • 31-50 წლის — 51,2%;
  • 51-70 წლის — 25,5%;
  • 71 და მეტი წლის — 0,9%;

რაც შეეხება საერთაშორისო ტურიზმის მონაცემებს, აღსანიშნავია, რომ აპრილში უცხოეთიდან საქართველოში 82 519 საერთაშორისო ვიზიტი განხორციელდა. ეს მონაცემი 2020 წლის აპრილთან შედარებით 140%-ით მეტია. იქიდან გამომდინარე, რომ 2020 წელს კორონავირუსის პანდემიისას დაწესებული შეზღუდვების გამო საქართველოში უცხოელი ვიზიტორების რაოდენობა მკვეთრად შემცირდა, ეს ზრდა გასაკვირი არ არის. ასევე, აღსანიშნავია, რომ მიმდინარე წლის იანვარ-აპრილში საქართველოში 212 707 უცხოური ვიზიტი განხორციელდა, რაც გასული წლის იმავე პერიოდთან შედარებით 82%-ით ნაკლებია.

შეგახსენებთ, რომ საკოორდინაციო საბჭოს გადაწყვეტილებით, პირველი ივნისიდან საქარველოს სახმელეთო საზღვრები იხსნება. ასევე, გაიზარდა იმ ქვეყნების ჩამონათვალი, რომელთა მოქალაქეებს ან რეზიდენტებსაც, 72 საათის განმავლობაში აღებული PCR ტესტით საქართველოში შემოსვლა შეეძლებათ.