დაავადებათა კონტროლის ეროვნული ცენტრის ხელმძღვანელი, ამირან გამყრელიძე რუსთავი 2-თან ადასტურებს, რომ საქართველოში Covid-19-ის ინდური შტამის შესწავლა მიმდინარეობს. მისივე თქმით, ქვეყანაში ინდური შტამი ჯერ დადასტურებული არ არის.

"შესწავლა მიმდინარეობს, მაგრამ დადასტურებული არ გახლავთ. ყველგან არის შესაძლებელი გამოვლინდეს, საქართველო გამონაკლისი არ არის. უახლესი პროგნოზირებით, თანდათან, შესაძლებელია, ევროპაში ბრიტანული შტამი ინდურმა შტამმა ჩაანაცვლოს", — განაცხადა გამყრელიძემ რუსთავი 2-თან.

23 მაისის მონაცემებით, საქართველოში კორონავირუსის 733 ახალი შემთხვევა დადასტურდა, გამოჯანმრთელდა 1 530, ხოლო გარდაიცვალა — 20 ადამიანი.

ბოლო 24 საათში ქვეყნის მასშტაბით ჩატარდა 16 972 კვლევა ტესტით, მათ შორის ანტიგენის სწრაფი ტესტით — 7 425, PCR-ით — 9 547.

Stopcov.ge-ზე გამოქვეყნებული ინფორმაციის თანახმად, დადებითობის დღიური მაჩვენებელი არის 4,32%, ბოლო 14 დღის განმავლობაში — 4,04%, ხოლო 7 დღის — 4,21%.