სამუშაო პირობების გაუმჯობესების მოთხოვნით, თბილისში, ქუთაისსა და ჩოხატაურში მინერალური წყლის, ნაბეღლავის თანამშრომლები გაიფიცნენ. კომპანიის მძღოლებისა და დისტრიბუტორების პროტესტს უკვე ქარხანაში დასაქმებულებიც შეუერთდნენ.

"დილის 10 საათიდან რომ დავიწყებთ [მუშაობას] შეიძლება ვიმუშაოთ გადაბმულად 36 საათი, 10 ან 24 საათი... ვითხოვთ ჩვეულებრივ 8 საათიან სამუშაო გრაფიკს. თუკი არ დაკმაყოფილება მოთხოვნები და გადამეტებულ საათს ვიმუშავებთ, განსხვავება იყოს დღის და ღამის. ხელფასი იყოს ნორმალური, როგორც არის სხვა ქარხნებში", — ამბობს კომპანია ნაბეღლავის თანამშრომელი, ტარიელ ანთიძე რუსთავი 2-თან.

"ანაზღაურება არ არის იმდენი, რაც შრომა გვიწევს. ხან 24 საათი ვარ და ხან მეტი კიდევ, გადაბმული მუშაობაა... ყველა ვინც აქ დგას, მაღაზიებში ნისიები აქვთ. ვერ აკმაყოფილებს ხალხი ოჯახს. პური რომ შევიტანოთ სახლში, ზოგჯერ იმის ფულიც არ გვაქვს", — ამბობს ნაბეღლავის კიდევ ერთი თანამშრომელი, მოსე კალანდაძე.

კომპანიის ხელმძღვანელმა მედიასთან თანამშრომლებთან მოლაპარაკებების მზადყოფნა გამოთქვა.

"შეიძლება მოლაპარაკებების დაწყება. ჩვენ აპრილის თვიდან ხელფასების მატება გვქონდა პოზიციების მიხედვით, დაახლოებით, 15-20%-ით, მაგრამ დღეს მოხდა ასეთი რაღაცა სპონტანურად, საერთოდ რომ არ ველოდით, მოითხოვეს კიდევ ხელფასის მატება. შევთავაზე, რომ დაველაპარაკებოდი ხელმძღვანელობას და განვიხილავდით ამ საკითხს, მაგრამ თანამშრომელთა ნაწილმა მიატოვა სამუშაო პოზიციები და დატოვეს ქარხნის ტერიტორია", — განაცხადა ქარხნის ხელმძღვანელმა, ვახტანგ მეგრელიშვილმა.

ნაბეღლავის თანამშრომლები მესამე დღეა გაფიცულები არიან თბილისში.

მეოთხე დღეა გაფიცულები არიან ბორჯომის ჩამომსხმელი ქარხნის თანამშრომლებიც. მათი ძირითადი მოთხოვნა ხელფასის გაზრდაა.