გირჩი — მეტი თავისუფლების ლიდერი, ზურაბ ჯაფარიძე აცხადებს, რომ "თუ არ ხარ მამრობითი სქესის, ჰეტეროსექსუალი, მართლმადიდებელი და ა.შ,\", საქართველოში ზემოდან გიყურებენ. ამის შესახებ მან On.ge-ის ინსტაგრამ ლაივში, დმანისში მომხდარ დაპირისპირებაზე საუბრისას განაცხადა.

"მე მჯერა, რომ სიმართლის ლაპარაკით გვარდება საბოლოოდ ეგეთი რაღაცები. სიმართლე არის ის, რომ ამ ქვეყანაში აზერბაიჯანელებს და არამხოლოდ აზერბაიჯანელებს მეორეხარისხოვან ადამიანებად თვლიან ვიღაცები. მარტო აზერბაიჯანელებზე არ არის ლაპარაკი რა. თუ არ ხარ მამრობითი სქესის, ჰეტეროსექსუალი, მართლმადიდებელი და ა.შ, დანარჩენი, ვინც არ უნდა იყო, გიყურებენ ზემოდან და მათ შორის, ეს ყველაფერი არის წახალისებული ისევ და ისევ საქართველოს საპატრიარქოს მხრიდან. ეგ მგონია ფუნდამენტური პრობლემა, როცა იმ ადამიანებს, საქართველოს მოქალაქეებს, რომლებიც ეთნიკურად აზერბაიჯანელები არიან, ისე უყურებენ, როგორც მეორეხარისხოვან მოქალაქეებს", — განაცხადა მან.

ჯაფარიძის თქმით, სანამ იქნება მიდგომა, რომ ეს ქვეყანა მხოლოდ ეთნიკურად ქართველებს ეკუთვნით, პრობლემები სულ იარსებებს.

"ეს ქვეყანა ან გადარჩება როგორც მულტიეთნიკური, მულტიკონფესიური და ა.შ. და საბოლოო ჯამში ლიბერალური დემოკრატია იქნება, როგორც სისტემა, ან ვერ გადარჩება. მარტო უკანასკნელი ათწლეულების გამოცდილებას რომ გადახედოთ, ეგეც აჩვენებს მაგას. ჩვენ თუ წავალთ და იგივე შეცდომებს დავუშვებთ, რომ ეს ქვეყანა მარტო ეთნიკურად ქართველების არის და ა.შ., დედა გვეტირება, როგორც არაერთხელ გვეტირა უახლოეს ისტორიაში", — განაცხადა ჯაფარიძემ.

დმანისში ადგილობრივებს შორის დაპირისპირება ყოფით ნიადაგზე დაიწყო. არსებული ინფორმაციით, დმანისში მცხოვრები რამდენიმე ეთნიკურად ქართველი მაღაზიაში პროდუქტს იღებდა, მაგრამ ფულს არ იხდიდა. 16 მაისს კი მეპატრონემ, რომელიც ეთნიკურად აზერბაიჯანელია, ამაზე უარი უთხრა, რამაც დაპირისპირება გამოიწვია. კონფლიქტის პირველ დღეს ათეულობით ადამიანმა ერთმანეთს ხელკეტებით სცემა. ეს გაგრძელდა მომდევნო დღესაც და უფრო მასშტაბური სახე მიიღო.

17 მაისს, დმანისში ხელისუფლების წარმომადგენლების მონაწილეობით ადგილობრივებს შორის შეხვედრა შედგა. შეხვედრის დასრულების შემდეგ, მოქალაქეებმა განაცხადეს, რომ შერიგდნენ და ერთმანეთს ხელი ჩამოართვეს.

გაიგე მეტი: