დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის მოადგილის, პაატა იმნაძის თქმით, არსებული გამოცდილებით, შესაძლოა, კორონავირუსის საწინააღმდეგო ვაქცინის დამატებითი დოზის მიღება გახდეს საჭირო.

"ეს არ არის წითელას ვაქცინა, რომელსაც, ორჯერ რომ აიცრები, მერე მთელი ცხოვრება იმუნიტეტი გაქვს. არის ასეთი ვაქცინები. აი, წითელა, ხომ?! იგივე დიფტერიის ანატოქსიდსაც კი ძალიან მყარი იმუნიტეტი აქვს, მაგრამ, იქაც კი კარგია, ვთქვათ, ერთი ათი წლის მერე, რომ კიდევ ერთი "ბუსტერ" ვაქცინაცია გაიკეთო.

გრიპის ვაქცინა ვიცით, რომ ყოველწლიურად უნდა გავიკეთოთ, ხომ?! აქედან გამომდინარე, არსებულ გამოცდილებაზე დაყრდნობით და არსებულ იმუნიტეტზე დაყრდნობით, ვთქვათ, გადატანილებში, შესაძლებელია, მაღალი ალბათობით ვიფიქროთ, რომ "ბუსტერი" საჭირო იქნება", — განაცხადა პაატა იმნაძემ.

ვაქცინის გამაძლიერებელი დოზის საჭიროებაზე ისაუბრა ამერიკის შეერთებული შტატების ალერგიისა და ინფექციურ დაავადებათა ეროვნული ინსტიტუტის ხელმძღვანელმა, ენტონი ფაუჩიმაც. მისი თქმით, გამაძლიერებელი დოზის მიღება, შესაძლოა, ვაქცინაციიდან ერთ წელში გახდეს საჭირო.