დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის განცხადებით, ჯერჯერობით, სამეცნიერო მტკიცებულებები დაგროვებული არ არის, მაგრამ დარწმუნებულია მალე გამოჩნდება პუბლიკაციები, სადაც Covid-19-ის ვაქცინების ურთიერთჩანაცვლების დაშვებაზე საუბარი იქნება.

"ყველა მწარმოებელი ამბობს, ჩემი ვაქცინით თუ დაიწყებო [აცრას], ჩემი ვაქცინით გააგრძელეო. გასაგებია, რომ გარკვეული ბიზნეს მიდგომაც არის. თუმცა ჩვენ ვიცით ძალიან კარგად, მაგალითად, გრიპზე როცა ვიცრებით, ერთ წელიწადს ერთი ვაქცინით ვიცრებით, მეორე წელიწადს — მეორე მწარმოებლით. ეს შეიძლება განსხვავებული იყოს თავისი წარმოების ტექნოლოგიითაც, მაგრამ მათი ყოველწლიური ურთიერთჩანაცვლება პრობლემას არ წარმოადგენს... მგონი, ჯერჯერობით, არ არის ვთქვათ სამეცნიერო მტკიცებულებები დაგროვილი, მაგრამ დაგროვდება და დარწმუნებული ვარ, სულ რამდენიმე ხანში გამოჩნდება პუბლიკაციები, რომ კორონავირუსის ვაქცინების ურთიერთჩანაცვლება შესაძლებელი იქნება", — განაცხადა იმნაძემ ჟურნალისტებთან ვებინარზე საუბრისას.

მისივე თქმით, ერთადერთი ვაქცინა, რომელზეც დღემდე მკაცრი რეკომენდაციებია არის ცოფის ვაქცინაა, სადაც რეკომენდებულია, რომ ვაქცინა არ შეიცვალოს და რა ვაქცინით დაიწყეთ, იმ ვაქცინით დაამთავროთ ცოფის საწინააღმდეგო აცრა. თუმცა, NCDC-ის დირექტორის მოადგილე აღნიშნავს, რომ იქაც არის გამონაკლისი, თუ შეუძლებელია იგივე ტიპის ვაქცინით აცრა, შეგიძლიათ შეცვალოთ, ოღონდ იგივე ტექნოლოგიით დამზადებული უნდა იყოს.