თბილისის წიგნის საერთაშორისო ფესტივალი ექსპო ჯორჯიას პაივილიონში ბრუნდება და ამჯერად მოქალაქეები დასწრებას არამხოლოდ ონლაინ, არამედ ფიზიკური სახით შეძლებენ. კერძოდ, ფესტივალი ჰიბრიდული იქნება და წიგნების შეძენა საფესტივალო ფასებად ვებგვერდზეც იქნება შესაძლებელი.

ოცდამესამე საერთაშორისო ფესტივალი 24 ივნისიდან 27 ივნისის ჩათვლით გაიმართება და კორონავირუსის გავრცელების პრევენციისთვის სპეციალური წესები იმოქმედებს. კერძოდ, ფესტივალზე სტუმრობის მსურველთათვის, პავილიონებში მოსული დამთვალიერებლების ნაკადების გასაკონტროლებლად, წელს აუცილებელია წინასწარი რეგისტრაცია თბილისის წიგნის საერთაშორისო ფესტივალის ახალ ვებგვერდზე.

ორგანიზატორების განცხადებით, საიტზე მომხმარებელი შეძლებს, დეტალურად გაეცნოს
ფესტივალის პროგრამას, რომელიც ეტაპობრივად გახდება ცნობილი. მათივე ინფორმაციით, 2021-ის პროგრამა იგეგმება რამდენიმე მიმართულებით: ახალი წიგნების პრეზენტაციები და მკითხველების შეხვედრა თანამედროვე ქართველ ავტორებთან, მთარგმნელებთან, გამომცემლებთან, ლიტერატურის კრიტიკოსებთან; პანელ-დისკუსიები სხვადასხვა აქტუალურ ლიტერატურულ თემაზე, ქართველი და უცხოელი სპიკერების მონაწილეობით; საერთაშორისო საგამომცემლო კონფერენცია სფეროს პროფესიონალებისთვის, ინდუსტრიაში მიმდინარე პროცესებთან დაკავშირებით; საბავშვო პროგრამა სპეციალურად პატარა მკითხველებისთვის, რომელიც სხვადასხვა ასაკობრივი კატეგორიისთვის გათვლილ გასართობ-შემეცნებით აქტივობებსა და ღონისძიებებს მოიცავს.

თბილისის წიგნის საერთაშორისო ფესტივალი 1997 წლიდან ყოველწლიურად ტარდება და კავკასიის რეგიონში ერთ-ერთი ყველაზე დიდი წიგნის ფესტივალია. ფესტივალის მიზანია საქართველოში წიგნის კითხვის პოპულარიზება, ახალი კონტაქტების დამყარება, წიგნის ბაზრის რეგიონალიზაცია და ზოგადად საგამომცემლო სექტორის განვითარების ხელშეწყობა.