ტორა ბრაიტი ოლიმპიური ოქროს მედლის მფლობელი ავსტრალიელი სნოუბორდისტია. დედის დღის აღსანიშნავად, ტორამ თავის ინსტაგრამზე 10 თვის შვილთან ერთად რამდენიმე ფოტო გამოაქვეყნა.

ფოტოების აღწერაში ტორა საუბრობდა იმ ცვლილებებზე, რაც მასში დედობრივმა სიყვარულმა გამოიწვია. "დედობამ რაღაც გააჩინა ჩემში, ეს ღრმად სულიერი შეგნებაა", — წერს სპორტსმენი.

თუმცა საზოგადოების ყურადღება ყველაზე მეტად ერთმა ფოტომ მიიპყრო. სურათში ტორა თავზე დგას, პატარა კი ვარჯიშს "არ აცდის" და ძუძუს წოვს.

ფოტო: Torah Bright/Instragram

ფოტომ ინსტაგრამის მომხმარებლების აზრი ორ ნაწილად გაყო. ზოგიერთი სნოუბორდისტს აკრიტიკებდა, ზოგი კი მის მხარდასაჭერ განცხადებებს აკეთებდა.

ამ მოვლენებს ბრაიტმა კიდევ ერთი პოსტი მიუძღვნა. მან ამჯერად ვიდეო გამოაქვეყნა, სადაც ხალხს ერთმანეთის პატივისცემისკენ და მხარდაჭერისკენ მოუწოდა.

"ვერც ვიჯერებ რომ ამ საკითხზე საუბარი მიწევს", — ამბობს ტორა ვიდეოში. "მესმის, რომ ეს ფოტო ყველას არ მოეწონებოდა. თუმცა ზოგიერთი ნეგატიური კომენტარის წაკითხვისას, ვხვდებოდი, რომ დედებმა ერთმანეთი კი არ უნდა განვსაჯოთ, არამედ მხარი დავუჭიროთ".

საბოლოოდ, ის ვიდეოს გაოცებული კომენტარით ამთავრებს: "ნუთუ მართლა გეგონათ, რომ ბავშვს ძუძუს ასე ვაწოვებ?!"

ტორა ბრაიტმა ოქროს მედალი 2010 წელს კანადაში გამართულ ზამთრის ოლიმპიადაზე მოიპოვა.

ფოტო: Getty Images