ქართული ოცნების თავმჯდომარის, ირაკლი კობახიძის განცხადებით პარტიის მიერ ჩატარებულ კვლევებში თბილისის მერი, კახა კალაძე რეიტინგით პირველ ადგილზეა. ამის შესახებ მან რუსთავი 2-ის ღამის კურიერში ისაუბრა.

"ჩვენ სოციოლოგიური გამოკითხვები გვაქვს ჩატარებული, ბოლო დროს, მათ შორის და ერთი რამ შემიძლია გითხრათ, რომ ჩატარდა, რა თქმა უნდა, ამ კვლეავში არ იყო დასახელებული ბიძინა ივანიშვილი, გამომდინარე იქიდან, რომ მან დატოვა პოლიტიკა. დანარჩენი ყველა, ვინც არის აქტუალური პოლიტიკოსი დღეს ჩართული პოლიტიკაში, ყველას სახელი და გვარი ვიკითხეთ და შემიძლია, ერთი საიდუმლო გაგანდოთ, რომ კახი კალაძე არის პირველ ადგილზე რეიტინგით დღეს. ეს არის არსებული მოცემულობა", — თქვა მან.

შემოდგომაზე თვითმმართველობის არჩევნები უნდა ჩატარდეს. ქართულ ოცნებას თბილისის მერობის კანდიდატი ჯერ არ დაუსახელებია, ოპოზიციაში უკვე საუბრობენ იმაზე, რომ ამ არჩევნებზე ისინი კვლავ გაერთიანებული სახით უნდა წარდგნენ. ზოგიერთი იმასაც აღნიშნავს, რომ თბილისის მერობის არჩევნებში ოპოზიციამ საერთო კანდიდატად ნაციონალური მოძრაობის ლიდერი, ნიკა მელია უნდა განიხილოს.