ქართული ოცნების დეპუტატის, ირაკლი ზარქუას თქმით, ვერ გაიგო რა კენჭისყრა ჰქონდა ევროპულ საქართველოს, რადგან ერთი დეპუტატი პარლამენტში შევიდა, ერთმა უარი თქვა, გიგა ბოკერია კი საშვის გარეშე ისედაც ვერ შედიოდა პარლამენტში.

"სულ რამდენიმე კანდიდატი ჰყავდათ წარდგენილი, პარლამენტში ერთი შემოვიდა, მეორემ უარი თქვა, მესამე, თუ არ ვცდები, ტოვებს პარტიას და ბოკერია საშვის გარეშე ისედაც ვერ შემოდიოდა პარლამენტში და ვერ გავიგე რა კენჭისყრა ჰქონდათ?", — განაცხადა ზარქუამ.

ევროპულმა საქართველომ დღეს, 18 მაისს განაცხადა, რომ არ აპირებს საპარლამენტო საქმიანობაში ჩართვას, ტარიელ ნაკაიძემ კი პარლამენტში შესვლა გადაწყვიტა.

აღსანიშნავია, რომ 2020 წლის არჩევნების შედეგად, ევროპულმა საქართველომ სულ 5 მანდატი მიიღო. მართალია, პარტია ოფიციალურად პარლამენტში არ შედის, მაგრამ იმ ადამიანებმა, რომლებიც არჩევნებზე ევროპულ საქართველოს წარმოადგენდნენ, საპარლამენტო საქმიანობაში ჩართვა გადაწყვიტეს. კერძოდ, დავით ბაქრაძემ, შალვა შავგულიძემ, არმაზ ახვლედიანმა და როგორც დღეს გახდა ცნობილი, ტარიელ ნაკაიძემაც. კიდევ ერთი მანდატი კი ელენე ხოშტარიას ეკუთვნის, რომელიც პარლამენტში შესვლას არ აპირებს, თუმცა უკვე დატოვა ევროპული საქართველო და ახალი პოლიტიკური მოძრაობა შექმნა.

ოპოზიციური პარტიების დიდი ნაწილი პარლამენტში შევიდა. განსხვავებული პოზიცია აქვს ლეიბორისტულ პარტიას, ასევე, ამ დროისთვის უცნობია ნაციონალური მოძრაობის საბოლოო გადაწყვეტილება.