თბილისის ზოოპარკს ორი ახალი ბინადარი შეემატა — ორი პაწაწინა ლემური, რომლებიც მზრუნველი დედის, კიჭას ტანზე მოუსვენრად ტრიალებენ და მშობელს არ შორდებიან.

ფოტო: Mzia Sharashidze / თბილისის ზოოპარკი

"ლემურების ვოლიერში ხალისიანი ორომტრიალია. აი, ზუსტად რომ "ორომტრიალი", რადგან მზრუნველი დედის, კიჭას ტანზე, მოუსვენრად ტრიალებს და ტრიალებს ორი ახალშობილი. დიახ! ჩვენ ორი პატარა გვყავს!", — წერს ზოოპარკის ადმინისტრაცია ფეისბუქზე.

პატარების მყუდრო თავშესაფარი ჯერჯერობით დედის სხეულით შემოიფარგლება. მზრუნველი მშობელი მათ საჭმლით ამარაგებს და როგორც კი ახალშობილები თამაშის ხასიათზე მოვლენ, დედას ზურგზე შემოასკუპდებიან და სამყაროს იქიდან იკვლევენ.

ფოტო: Mzia Sharashidze / თბილისის ზოოპარკი

როგორც კი პატარები წამოიზრდებიან, დედას ჩამოსცილდებიან და სხვა ლემურებთან ერთად ვოლიერში დამოუკიდებლად გააგრძელებენ ცხოვრებას.