საქართველოს პრემიერმინისტრმა გიორგი კვირიკაშვილმა დღეს, 23 მაისს, თბილისში გახსნა ტექნოლოგიური ინსტიტუტის მშენებლობა, რომელსაც ბიძინა ივანიშვილი აფინანსებს. პრეზენტაციას ესწრებოდა ბიძინა ივანიშვილი ცოლთან, ეკატერინე ხვედელიძესთან ერთად. ადგილზე იმყოფებოდა ფიზიკოსი გია დვალიც.

გიორგი კვირიკაშვილმა ბიძნა ივანიშვილს "განსაკუთრებული მადლობა" გადაუხადა:

"ტექნოლოგიური ინსტიტუტი ეპოქალური მნიშვნელობის პროექტია ჩვენი ქვეყნისათვის და მივესალმები ყველას. ამ რამდენიმე ასეული მილიონი ევროს ღირებულების პროექტს საერთაშორისო საქველმოქმედო ფონდი ქართუ ახორციელებს. მინდა მივესალმო და განსაკუთრებული მადლობა ვუთხრა ბატონ ბიძინა ივანიშვილს ამ კიდევ ერთი საშვილიშვილო საქმის წამოწყებისათვის. დარწმუნებული ვარ, რომ ეს ინსტიტუტი გახდება ერთ ერთი ყველაზე დიდი სამეცნიერო და საგანმანათლებლო ცენტრი რეგიონში. განსაკუთრებით მინდა აღვნიშნო ამ პროექტის ყველაზე მთავარი კომპონენტი, ნაწილაკთა ამაჩქარებლის მშენებლობის მნივნელობა. ფართო წრეებში კოლაიდერად ცნობილი ნაწილაკების კომპლექსის მეშვეობით, ქართველ მეცნიერებსა და მეცნიერთა ახალ თაობას შეეძლებათ უმნიშვნელოვანესი კვლევების ჩატარება, მათ შორის მედიცინის, კერძოდ კი, ონკოლოგიის ადრონული თერაპიის მიმართულებით".

გიორგი კვირიკაშვილი ტექნოლოგიური ინსტიტუტის გახსნაზე. თბილისი. 23 მაისი, 2016.

ფოტო: კადრი ვიდეოდან

გიორგი კვირიკაშვილის თქმით, ეს იქნება მსოფლიოში სიდიდით მეხუთე ტექნოლოგიური ინსტიტუტი, სადაც მნიშვნელოვანი კვლევები ჩატარდება ფიზიკის, ქიმიის, ბიოლოგიის, მათემატიკის, კომპიუტერული ტექნოლოგიებისა და ინჟინერიის მიმართულებით: "მინდა ხაზი გავუსვა იმას, რომ სტუდენტების სწავლასა და პარტნიორ ორგანზიაციებში მათ მივლინებებს, მთლაინად დააფინანსებს ფონდი ქართუ. ინსტიტუტის სტუდენტები თვითონ მიიღებენ მონაწილეობას ექსპერიმენტული ბაზის მშენებლობასა და მის ექსპლუატაციაში გაშვებაში".