ამერიკელი სენატორის ჯიმ რიშის განცხადებით, ის მოხარულია, რომ ნაციონალური მოძრაობის თავმჯდომარე, ნიკა მელიას თავისუფალს ხედავს და ამბობს, რომ ახლა ყველა პოლიტიკური პარტიის საქართველოს პარლამენტში ხილვას ელოდება. ამის შესახებ მან ტვიტერზე დაწერა.

"მოხარული ვარ ნაციონალური მოძრაობის ლიდერის, ნიკა მელიას ციხიდან გათავისუფლებით და 2021 წლის აპრილის შეთანხმების შესრულებით. ახლა ველოდები, რომ ყველა პოლიტიკური პარტია საქართველოს პარლამენტში თავის ადგილს დაიკავებს და ერთად იმუშავებს", — წერს რიში.

ნიკა მელიამ რუსთავის #12 ციხე 10 მაისს დატოვა. მისი გათავისუფლება ქართულ ოცნებასა და ოპოზიციას შორის 19 აპრილს დადებული შეთანხმების ნაწილი იყო. თავდაპირველად, ნაციონალური მოძრაობის თავმჯდომარემ, ნიკა მელიამ შეთანხმებაში გათვალისწინებულ ევროკავშირის მიერ შემოთავაზებულ გირაოზე უარი განაცხადა, თუმცა 26 აპრილს მან გირაოთი გათავისუფლებაზე მზადყოფნა გამოთქვა, იმ შემთხვევაში, თუ ამნისტიის კანონს უკან გაითხოვენ.

6-თვიანი ბოიკოტის შემდეგ, ოპოზიციის ნაწილმა დოკუმენტს ხელი მოაწერა და 27 აპრილს პარლამენტში მივიდა. დოკუმენტს ხელს არ აწერს ნაციონალური მოძრაობა. პარტიაში ამბობდნენ, რომ დოკუმენტს ხელს ნიკა მელიას გათავისუფლებამდე არ მოაწერდნენ, თუმცა, აქამდე დაზუსტებით არც ერთ წევრს არ უთქვამს, რომ მელიას გამოსვლის შემდეგ საპარლამენტო საქმიანობაში მონაწილეობას მიიღებდნენ. აღსანიშნავია, რომ დოკუმენტს ინდივიდუალურად მოაწერა ხელი სალომე სამადაშვილმა.