გარემოს ეროვნული სააგენტო საქართველოს სხვადასხვა რეგიონში განთავსებული სასიცოცხლო მნიშვნელობის ავტომატურ სადგურებზე მოსახლეობის მხრიდან გახშირებული ვანდალური შემთხვევების გამო შეშფოთებას გამოთქვამს.

სააგენტოს ცნობით, სადგურების დაზიანების ფაქტები, ძირითადად, კახეთის, მცხეთა-მთიანეთისა და სამეგრელო-ზემო სვანეთის რეგიონებში ფიქსირდება. მათივე თქმით, აღნიშნული სადგურების ფუნქციონირება ქვეყნის მოსახლეობის უსაფრთხოების დაცვას ემსახურება. კერძოდ, ავტომატური მოწყობილობების საშუალებით, გარემოს ეროვნულ სააგენტოს უწყვეტ რეჟიმში მიეწოდება მონაცემები სხვადასხვა მდინარის წყლის დონეების მატებისა და მიმდებარე ტერიტორიაზე მოსული ატმოსფერული ნალექების რაოდენობის შესახებ.

"სადგურებიდან მიღებული ინფორმაციით, ასევე, ხდება მიწისქვეშა მტკნარი სასმელი წყლების რაოდენობრივი და ხარისხობრივი ძირითადი მახასიათებლების დადგენა, რომლის საბოლოო მიზანს გრძელვადიან პერსპექტივაში ადგილობრივი მოსახლეობის ხარისხიანი სასმელი წყლით უზრუნველყოფა წარმოადგენს.

სადგურები, ძირითადად, განთავსებულია დაუსახლებელ ადგილებზე და მდინარეების მიმდებარედ. შესაბამისად, კომუნიკაციების არ არსებობის გამო, მათი სრულყოფილი დაცვა რთულდება", — აცხადებენ გარემოს ეროვნულ სააგენტოში.

მათივე განცხადებით, სადგურების დაზიანებით გამოწვეული ფინანსური ზარალი ათეულობით ათას ლარს აღემატება.

"თითოეულ ვანდალურ ფაქტთან დაკავშირებით, გარემოს ეროვნული სააგეტოს მიმართვის საფუძველზე, სისხლის სამართლის არაერთი საქმეა აღძრული", — აღნიშნულია განცხადებაში.

სააგენტო მოსახლეობას ვანდალიზმის შეწყვეტისკენ მოუწოდებს.