ნაციონალური მოძრაობის თავმჯდომარის ნიკა მელიას განცხადებით, ყოფილ თანაგუნდელსა და ამავე პარტიის ყოფილ ხელმძღვანელზე, ისევე, როგორც სტრატეგია აღმაშენებლის ლიდერზე გაბრაზებული არ არის.

"რატომ მეკითხებით? გრიგოლზე? ბატონ გრიგოლზე? არც ბატონ გრიგოლზე და არც გიორგი ვაშაძეზე ვარ გაბრაზებული", — ასე უპასუხა მან ჟურნალისტის კითხვას გიორგი და გრიგოლ ვაშაძეებზე.

ორივე პოლიტიკოსი შარლ მიშელის ინიცირებული შეთანხმების დოკუმენტის მხარდამჭერია. აღსანიშნავია ისიც, რომ გრიგოლ ვაშაძემ ნაციონალური მოძრაობის დატოვების შემდეგ მოაწერა ხელი დოკუმენტს მაშინ, როცა პარტიას იგივე არ გაუკეთებია.

სტრატეგია აღმაშენებლის ლიდერის, გიორგი ვაშაძის განცხადებით, თვითმმართველობის არჩევნებში ნაციონალური მოძრაობის კანდიდატის მხარდაჭერა "მარცხის ფორმულაა". მისივე თქმით, მელია თბილისის მერობის არჩევნებზე გაერთიანებული ოპოზიციის კანდიდატი ვერ იქნება.

ნიკა მელიამ რუსთავის #12 ციხე დღეს, 10 მაისს დატოვა. პროკურატურამ თბილისის საქალაქო სასამართლოს აღკვეთის ღონისძიების გირაოთი შეცვლის შუამდგომლობით 9 მაისს მიმართა. სასამართლომ მოთხოვნა დააკმაყოფილა. მელიას გირაოს თანხა ევროკავშირმა გადაიხადა.