მსახიობმა გალ გადოტმა, რომელმაც მაყურებლებს თავი განსაკუთრებულად Wonder Woman-ის პერსონაჟით დაამახსოვრა, დაადასტურა ჭორები იმის შესახებ, რომ Justice League-ს რეჟისორის, ჯოს უედონის დამამცირებელი მოპყრობის ადრესატი იყო და ფილმის გადაღების დროს რეჟისორი მას კარიერის დანგრევით ემუქრებოდა. ამის შესახებ მსახიობმა N12 News-თან ინტერვიუში აღნიშნა.

"ჯოსთან ის მაკავშირებს, რომ ის, გარკვეულწილად, კარიერის დანგრევით დამემუქრა და მითხრა, რომ თუ ისე არ მოვიქცეოდი, როგორც მეტყოდა, ჩემს კარიერას აუტანელს გახდიდა. ამ ყველაფერს ადგილზე გავუმკლავდი".

გალ გადოტის მიმართ უედონის უარყოფითი დამოკიდებულების შესახებ ინფორმაცია პირველად The Holllywood Reporter-მა გაავრცელა, როდესაც მედია გადასაღებ მოედანზე უედონის მიუღებელი ქცევის შესახებ მსახიობ რეი ფიშერს გაესაუბრა. რეი ფიშერმა სხვა მსახიობების გამოცდილებაზე საუბრისგან თავი შეიკავა, თუმცა The Holllywood Reporter-ის სტატიაში ვკითხულობთ, რომ სანდო წყაროს მიხედვით, დამამცირებელი მოპყრობის ერთ-ერთი მსხვერპლი გალ გადოტიც იყო. წყაროს მიხედვით, უედონი გადასაღებ მოედანზე თავს იწონებდა და ამბობდა, რომ გალ გადოტი ფილმში იმას იტყოდა, რასაც უედონი მოისურვებდა და რეჟისორს შეეძლო, მსახიობი სულელად გამოეყვანა.

აღსანიშნავია, რომ უედონთან დაკავშირებული არასასიამოვნო გამოცდილების შესახებ მხოლოდ რეი ფიშერი და გალ გადოტი არ საუბრობენ. რეი ფიშერის განცხადებებს მხარი დაუჭირა სერიალების Buffy the Vampire Slayer და Angel-ის მსახიობმა ქარიზმა კარპენტერმა, რომელმაც ტვიტერზე აღნიშნა, რომ რეჟისორისგან დამამცირებელი მოპყრობის მსხვერპლი იყო.

ამ საკითხთან დაკავშირებით რეჟისორს ჯერჯერობით კომენტარი არ გაუკეთებია.