გაუპატიურებისა და თვითმკვლელობამდე მიყვანის ბრალდებით ერთი ადამიანი დააკავეს. პროკურატურამ მას ბრალი 6 მაისს წარუდგინა.

"შინაგან საქმეთა სამინისტროს მიერ ჩატარებული გამოძიებით დადგინდა, რომ 2021 წლის 5 მაისს, თბილისში, ბ.თ.-მ ფსიქოლოგიური ზემოქმედებით და სიცოცხლის მოსპობის მუქარით ა.ა. გააუპატიურა", — ნათქვამია განცხადებაში.

უწყების ცნობით, მას ბრალი საქართველოს სისხლის სამართლის კოდექსის 137-ე მუხლის მე-2 ნაწილის "ბ" ქვეპუნქტით და 115-ე მუხლის პირველი ნაწილით წარედგინა, რაც გაუპატიურებასა და თვითმკვლელობამდე მიყვანას გულისხმობს. დანაშაული სასჯელის სახედ და ზომად 8-დან 10 წლამდე თავისუფლების აღკვეთას ითვალისწინებს.

სუიციდი არ არის გამოსავალი. დახმარების მისაღებად დაუკავშირდი გადაუდებელი სატელეფონო ფსიქოლოგიური დახმარების ცხელ ხაზს: 2 911 000; თუ ხარ ძალადობის მსხვერპლი დაუკავშირდი 112-ს.

სუიციდური აზრების მქონე ადამიანების დასახმარებლად სპეციალური, 24-საათიანი ცხელი ხაზი საქართველოში არ არსებობს. თუმცა არის მოქმედი სატელეფონო ფსიქოლოგიური მომსახურებები, რომლებიც ხშირ შემთხვევაში სამუშაო საათებში მუშაობს, მათ შორის:

  • პროექტი ბავშვთა დახმარების ცხელი ხაზი (116 111; 2 421 422);
  • განათლების სამინისტროს მანდატურების სამსახურის ბაზაზე არსებული ფსიქოლოგიური საკონსულტაციო მომსახურების 24-საათიან ცხელი ხაზი (08 00 00 00 88);
  • განათლების სამინისტროს ბაზაზე არსებული ფსიქო-სოციალური მომსახურების ცენტრის ცხელი ხაზი: 2 200 220 (3025) და მონიტორინგის სამმართველოს ცხელი ხაზი 2200220 (3335).